3823/2024-2025

Aizawl, the 16th January, 2025: Vawiin chawhma khan General (Dr) Vijay Kumar Singh, PVSM, AVSM, YSM (Retd) chu Mizoram Governor 25-na ni turin Circular Lawn, Raj Bhavan, Aizawlah rinawmna thu tiam tira lakluh a ni.

Gauhati High Court Chief Justice Vijay Bishnoi chuan General (Dr) Vijay Kumar Singh, PVSM, AVSM, YSM (Retd) hi rinawmna thu tiam tirin Governor atan a lalut a. Chief Secretary Pu Khilli Ram Meena chuan President of India-in Governor atana a ruatna a chhiar chhuak a ni.

Governor thar lakluhna hunah hian Chief Minister Pu Lalduhoma, Chief Minister hlui pahnih Pu Lal Thanhawla leh Pu Zoramthanga, Speaker Pu Lalbiakzama, Home Minister Pu K. Sapdanga, Leader of Opposition Pu Lalchhandama Ralte, Cabinet Minister-te, Gauhati High Court Judge, Dy. Speaker, Minister of State-te, Lok Sabha MP, Rajya Sabha MP, MLA te, Chief Secretary, DGP, Political party leh NGO hruaitute bakah sawm bik mi pawimawhte an tel a ni.

General (Dr) Vijay Kumar Singh, PVSM, AVSM, YSM (Retd) hi May ni 10, 1951 khan Captain Jagat Singh (a hnua Colonel ni ta) leh Pi Krishna Kumari te inkarah Pune-ah a lo piang a. Pi Bharti Singh nen inneiin fanu 2 leh tu 1 an nei mek a ni. Birla Public School, Pilani leh National Defence Academy-ahte lehkha zirin Sipai a luh hnuah Indian Army Chief of the Army Staff 26-na dinhmun a chelh tawh a ni.

General Singh hi June ni 14, 1970 khan 2nd Battalion of The Rajput Regiment (Kali Chindi) ah commision a ni a. Defence Services Staff College, Wellington atanga honour graduate niin, US Army Rangers Course at Fort Benning, USA leh USA Army War College, Carlisle, Pennsylvania atanga graduate a ni tel bawk.

Sri Lanka-a IPFK kaihhnawih operation avangin Yudh Seva Medal (YSM) hlan a ni a, kum 2005-a Counter Insurency force hlawhtling tak a kaihhruai avangin Ati Vishisht Seva Medal (AVSM) hlan niin, kum 2009-a Eastern Theatre-a hna tha leh chhinchhiah tlak bik a thawh avangin Para Vishisht Seva Medal (PVSM) hlan a ni a. March ni 31, 2010 khan Chief of the Army Staff dinhmun luah tanin, May ni 31, 2012 khan he dinhmun atang hian a chawl ta a ni.

March ni 11, 2011 khan United States War College (Class of 2001) International Fellows Hall of Fame 33-na atan lakluh a ni a, Indian Armed Forces Officer zinga lakluh hmasak ber a ni.

General Singh hian March ni 1, 2014 khan Bhartiya Janta Party zawmin, khami kum Lok Sabha Election kha Ghaziabad constituency (nuai 24 chuang vote awmna) atangin hlawhtling takin a chuh a, India rama inhnehna sang berin a chak a ni. MoS for External Affairs, MoS Independent charge for DoNER leh MoS for Overseas Indian Affairs mawhphurhna a chelh a. MoS MEA a nih laiin ram dang nena inbiakna pawimawh hrang hrangahte a tel thin bakah Asia, Africa, Latin America & Caribbean leh Europe-ahte hna pawimawh bik thawk tura ruat thin a ni.

Yemen leh Sudan ram buai civil war laia mi 7000 chuang chhanchhuahna kalpui kawngah leh ISIS te'n Iraq-a India mi an rukbo leh thahzuite ruang 39 India rama lakkir kawnga hmalaknaahte a hmingtha hle a ni. Ghaziabad atang vek hian kum 2019 Parliamentary election chuh lehin vote 5.15 chuangin a chak a, MoS Road Transport and Highways dinhmun chelhin June 2021 khan MoS Civil Aviation mawhphurhna pek belh a ni.

Russia leh Ukraine buaina avanga India khua leh tui zirlai 18000 dawn Ukraine-a tangkhangte la chhuak tura Operation Ganga kalpui a nih khan General VK Singh hi Poland atanga chhanchhuah hna kalpui turin Sawrkar laipuiin a tir a, zirlai 4000 dawnte chhanchhuah leh thawnhaw hna hlawhtling takin a thawk a ni.

Kum 2003 khan Silkyara, Uttarakhand-a tunnel siam mek chim avanga hnathawktu 41an tan tum khan MoRTH hnuaiah General (Dr) VK Singh, PVSM, AVSM, YSM (Retd) chu chhanchhuah hna buaipui tura tirh niin, ni 16 chhung cham chilhin hnathawktu 41 te him dam taka chhanchhuah an ni.