861/2026-2027

Dated Aizawl the 05 June 2026 :  Vawiin khan Comerce & Industry Department changtu Minister Pu F. Rodingliana chuan I&PR Auditorium, Treasury Square-ah MIZORAM APEX HANDLOOM & HANDICRAFT COOPERATIVE SOCIETY LTD. (MAHCO) 47th ANNUAL GENERAL ASSEMBLY 2026 chu khuallian niin a hmanpui.

He hunah hian khuallian, Commerce & Industry Department changtu Minister Pu F. Rodingliana chuan thusawiin, MAHCO Annual General Assembly vawi 47na a hmanpui thei chu lawmawm a tih thu a sawi a. India ram hmun hrang hrangah Cooperative Society-te dinhmun pawimawhzia leh Mizoramah pawh kawng tam taka State intodelhna tura ban pawimawh tak an nihzia tar langin, MAHCO chu mi tam tak eizawnna petu a ni tih a sawi a. Mizo puantah leh thiamhnang hmanga siam chhuah thilte chu hnam dang pawhin an hlutpui hle thin tih sawiin, kan hnam hmel tilangtu leh hnam rohlu vawn thatna pawimawh tak pawh a nihzia te hre reng turin kalkhawmte chu a chah bawk a. Minister chuan Sawrkar laipui chuan ruahmanna changtlung tak nen Handloom Industry tihhmasawndan tur ruahmanna a siam tih tarlangin, Mizoram pawhin chumi hlawhtlinna chu a hmuh chhoh zel a beisei tih a sawi a. Annual General Assembly chu hlawk taka hmang theuh turin kalkhawmte chu duhsakna a hlan nghal a ni.

Assembly-ah hian Pu John LT. Sanga, Registrar, Cooperative Societies pawhin thusawiin, Handloom Industry chu mi tam tak eizawnna siamsaktu a nih angin, sawrkar pawhin a ngaipawimawh hle tih a sawi a. Computerisation of RCS Office hmalakna hnuaiah primary society ten dilna an thlen thinte pawh, District Cooperative Officer-te kaihhruainain, online veka kalpui tawh tur a nih dante tarlangin, tun hnai mai khan PACS 24-te hnenah Computer set leh a kaihhnawih thil pawimawhte pek chhuah a ni tih a sawi a. Mamawhtute tana awlsam zawkna turin Digitisation chu sawrkar ngaihpawimawh ber pakhat a ni tih a sawi bawk a ni.

MIZORAM APEX HANDLOOM & HANDICRAFT COOPERATIVE SOCIETY LTD. (MAHCO) hi kum 1977 khan din niin, Tun dinhmunah, MAHCO hnuaiah hian Cooperative Society 96 an awm mek a. Mizoramah hian puan taha ei zawng chu mi 25134 lai an awm nia ngaih a ni a. RCS hnuaiah pawh Handloom & Handicraft Primary Society 180 vel awmin, heng zinga zaa sawmngapathum vel chu MAHCO hnuaiah hian an inziak lut a ni.

Vawiina hun hman hi Pu Lalrinkima, Chairman, MAHCO chuan kaihruaiin kalkhawmte lawmna thu a sawi a. Pi L. Lalzidingi, Managing Director hnen atangin 2025-26 inkara MAHCO dinhmun tlangpui leh hmalaknate ngaihthlak niin, Pu Lalrinawma Pachuau, Manager hnen atangin MAHCO hmathlir leh hmalak zui zeldan tur (Annual Action Plan)-te ngaihthlak a ni bawk a. Member kum 70 chung lamte hnenah lawmpuina leh chawimawina thilpek hlan nghal a ni a. Pi Ngaichhingi, BOD, MAHCO Ltd. chuan lawmthu sawiin hun hi a khar a ni.