Vawiin Dt 19.6.2015 Zirtawpni khan tun hnaia National Defence Academy(NDA) paltlanga IMA pass chhuak Commissioned officer Lalremruata Ralte s/o Lalthanzuala Mission Vengthlang Aizawl chawimawina hun School Education Directorate Conference hall-ah neih a ni a, Parliamentary Secretary Pu Joseph Lalhimpuia’n a hmanpui.
Pu Joseph Lalhimpuia chuan he hunah hian thusawiin Commissioned Officer-a luh hi a har a, Mizo zingah NDA paltlanga IMA pass chhuak thar kan awm hi kan chhuang hle a, Department-in kan ngaihlu a, Mizo zirlai tan kan icon a ni, a ti a. Mizo zingah sipai lama la thleng sang ber tura a beisei thu a sawi. Zirlaite zingah RIMC a lut engemawzat an awm tawh tih tarlangin state thenawm Meghalaya leh Nagaland ten an seat neih an luah khah mang loh avangin chung luah khat tur chuan kawng a awm theih beiseiin hma an la tih a sawi bawk. Chhingchhip-a Sainik School chu kum 2017 ah class VI atangin tan a ni dawn tih sawiin Pu Lalhimpuia chuan seat 66 a awm dawn a, hei hi entrance paltlanga luh a ngai dawn a ni a ti a. Lalremruata Ralte chu Sainik School Mizoram quota atanga zir chhuak a ni tih sawiin tunah hian School Education Dept. in Imphal Sainik School-ah seat 30 kan nei a, hei hi entrance paltlanga luh ngai a ni a ti bawk. RIMC ah pawh India ram puma seat 24 awmah Mizoram-in seat 1 kan nei a, seat 1 aia tam neih dan kan Chief Minister hovin ngaihtuah mek a ni a ti a, Banasthali Rajasthan-ah pawh hmeichhe tan seat 15 kan nei a, hei pawh hi tihpun dan kawng zawn mek a ni a ti bawk.
Commissioned Officer Lalremruata Ralte pa Pu Lalthanzuala pawhin he hunah hian thu sawiin School Education Dept. Chu an fapa-in Commissioned Officer ni tura a bul tanna a ni tih a sawi a, Sainik School-a lut tura buaipuitu leh NDA a tlin a, sum leh paia puitu chu School Education Dept. a ni tiin Dept chunga a lawmthu a sawi.
He chawimawina hunah hian Lalremruata Ralte hi phalna nei lo chuan Uniform nena a inlan a rem loh avang leh public-a inlan pawh phalna lak ngai anih avangin a tel thei lova, a aiawhin a pa a tel a, chawimawina leh lawmpuina thilpek te pawh a aiawhin a pain a dawng a ni.
