Mizoram Governor Lt.Gen.Nirbhay  Sharma,PVSM,UYSM,AVSM,VSM(Retd) chuan vawiin chawhnu khan Aizawl Civil Hospital a tlawh a,ward hrang hrang a fang kual a, man tlawm zawka damdawi zawrhna generic drug store chu tlawhin mipui ten tun aia nasa zawka an hman tangkai theih nana tan la turin thawktute a chah.

 Governor hnenah hian Aizawl Civil Hospitala thawktute chuan an hnathawh dan hrang hrangte an lo hrilh a, Aizawl Civil Hospital North East-ah  ISO Certification nei hmasa ber an nih thute lo hrilhin, Mizoram sawrkar in tha taka a enkawl avanga Hospital-in nasa takin hmasawnna a hmuh chhoh zel thute an lo hrilh a ni.

Governor Lt.Gen.Nirbhay Sharma chuan, Aizawl Civil Hospitala thawktute chu fakawm a tih thu sawiin, Doctor hna chu eizawnnan  maia hmang lo in midangte tana malsawmna ni tura theih tawp chhuah zel tura a duh thu a sawi a. Governor chuan thawktute enkawl chungchangah harsatna an tawh leh tawh loh a zawh chu Doctor te chuan inenkawlna kawngah buaina lo awm tawh thin mahse thawktute inlungrualna avangin tunah chuan inngeih tlang takin hna an thawh chhoh zel thu Governor chu an hrilh.

 Governor hian Aizawl Civil Hospital a tlawh hian Damlo khawsak harsa te hman atan Aizawl Civil Hospital hotute hnenah cheng singhnih (Rs.20000) a pe a ni.

Governor hi a nupui Pi Jyostna Sharma, Secretary to Governor Pu Rodney L Ralte, Health & Family Welfare Principal Director Dr K Ropari, H&ME Director Dr Lalbiakkima, Aizawl Civil Hospital Medical Superintendent Dr Rosangluaia leh doctor-te'n an tawiawm a ni.