School Education Department hi a kal rei tial tial a, a inthlifim zel dawn a ni, Pu Joseph Lalhimpuia Parliamentary Secretary chuan a ti. Hemi chungchang hi School Education Department Officers Meeting Dt 19.6.2015 Zirtawpni chawhma dar 10 a School Education Directorate Conference hall-a neihah a sawi a.

 School Education Officers Meeting-ah hian Pu Joseph Lalhimpuia chuan Mizoram sorkara Department upa ber leh lian ber School Education Department-ah hian sorkar record-a a lan danin British hun laia Superintendent Shakespear-a’n Honorary inspector atan kum 1904 khan kan Zosap te D.E.Jones leh F.W.Savidge te chu chhim lam leh hmar lam bial turin a lo ruat tawh a, chumi atanga kum 100 chuang kan kal tawh hnuah pawh School Education Department hi felfai a har hle a ti a. Amaherawhchu, Lui lian pawh a luang rei tial tial a, a luang fim tawlh tawlh ang hian Education Dept pawh a kal rei tial tial a, a inthlifim zel dawn a ni, a ti. Pu Mahima chuan State ralmuang berah Department hlun leh lian ber Education Department-in vau leh nawrh khum kan tawk tam hle a ni a ti a. Kan society hian kan intunnunna lian ber,  mihring chherchhuaktu Department ber a khat tawka vau leh nawrhkhum fo mai hi chu mipuite inenfiah a tul tiin chutih rual erawh chuan Department-a thawktute pawh inenfiaha fimkhur a tul hle a ni, a ti bawk. Parliamentary Secretary chuan thawktute chu zahawm taka awm a, an nungchang te pawh entawntlak leh mi zahkaia awm a tul a sawi a. Kalphung thar leh mahni hna pawh thawk thei lo kan awm anih chuan kan indim dawn lo, a ti a. DEO leh SDEO te pawh anmahni bial enfiaha hrechiang turin a chah a, a tul angin Minister leh Parliamentary Secretary Office atanga monitor an ni dawn tih a sawi bawk.  

 Sports leh Academic lama hmasawnna tarlangin Pu Joseph Lalhimpuia chuan Academic record pawh a tha chho zel a, kum 5 chhunga kan record en hian hma kan sawn zel a, a lawmawm hle a ni a ti bawk.

 School Education Officers meeting-ah hian Directorate-a Officer-te, DEO leh SDEO te an tel kim hle a ni.