1316/2023-2024

Aizawl, 31st July, 2023 : Commonwealth Parliamentary Association India Region Zone III Annual Conference vawi 20-na, 28th July - 1st August chhung Shillong, Meghalaya-a neih mekah Mizoram Assembly Speaker Pu Lalrinliana Sailo leh Deputy Speaker Pu H.Biakzauva te an tel a. Executive Committee meetingah thupui pahnih, “Natural Disaster and Strategies for Management with Special Reference to North East India” leh Regional Connectivity to bring North East Region at par with Mainland India” sawiho a ni.

Meetingah hian Mizoram Assembly Speaker Pu Lalrinliana Sailo chuan India hmarchhak bial chu khuarel chhiatna hrang hrang in a nuai thin thu leh, chhiatna laka inveng turin CPA India Region Zone III member te chu tanrual a ngai tih a tarlang a. United Nations Sustainable Development goals signatory an nihna angin hmasawnna atana hna an thawhna kawngah tun hun atan mai ni lo, chhuan lo awm zel turte ngaihtuahna nei chunga hmalak a tul thu leh, hei hian ramngaw humhalhna kawngah pawh awmzia a nei thei ang, tiin a sawi a.

Manipur tualchhung buaina avanga mi tam takin Mizoram an rawn pan thu tarlangin Pu Rinliana chuan Zofate harsatna ah Mizoram sawrkar chu a tlanchhe dawn lo, a ti a. Ram chhunga buaina punlun zel leh mahni ram chhunga India khua leh tui te ngeiin an tawrhna chu hawisan lova, theihtawpa tanpui turin CPA Zone III member te chu a sawm bawk a ni.

Deputy Speaker Pu H.Biakzauva pawhin India hmarchhak bialin India ram hmun zau zawk tluka hma a sawn ve theih nan inkawlpawhna tha a pawimawh thu sawiin chuta tana India sawrkar hmalakna te a tarlang a. Kaladan Multi Modal Transit Transport Project leh NH 54 zauh te chuan hmarchhak bialah hmasawnna tam tak a thlen thei dawn a ni, a ti a. Chutih rualin hmasawnna project te hian environment a tihchhiat theih dan ngaihtuah tel a pawimawh zia pawh a sawi a. Information & Communication Technology lama hmasawnna a pawimawh thu te, Union Budget-a 7 priorities zingah ‘Inclusive Development” leh “Reaching the last mile” te tarlan a nih angin policy leh hmalakna kawng tinrengah mitin huapzo leh hmun kilkhawr ber thleng phaka hmasawnna hna kalpui thin ni se a duhzawm zia a sawi bawk a ni.

Nakum CPA India Region Zone III Executive Committee Meeting 6th-8th Februay, 2024 a neih tur hi Mizoram in a thleng dawn a ni.