Vawiin khan District Transport Office, Mamit-ah Railway Ticket Booking leh Passenger Reservation System (PRS) chu Pu John Rotluangliana, Deputy Speaker in ribbon chep chatin a hawng.
Hawnna inkhawm DC Conference Hall, Mamit-a buatsaih Pu H. Darzika, Secretary, Transport, kaihhruaiah thu sawiin Deputy Speaker chuan tunlai hmasawnna in a ken Rail Ticket lakna kan kawtkai maia tih theih a a lo awm ta hi District tan hmasawnna chhinchhiah tlak a ni a ti a. Hun lo kal leh zel atan pawh awlsamna min siamtu ni mai lovin, changkanna min thlentu a ni a ti a. Rail chuan man te a tlawmin bungraw phurh man te a tlawm a, Bairabi atanga Sairang thleng rail kawng a tlang hunah phei chuan helai, Mamit District mipuite hian a zar kan la zo dawn a ni a ti bawk. Bialtu MLA ni bawk Pu John Rotluangliana chuan hemi alo hlawhtlinna tur atan Department hmalakna fakin District mipuite aiawhin lawmthu a sawi bawk a ni.
He hunah hian Pu P.C. Zoramsangliana, Minister, Transport etc. khual zahawm pawhin thusawiin Pathian hruaina a hetiang hmasawnna hawn theih a a lo awm ta hi a ropui a, Mamit mipuite tan chhinchhiah tlak a ni a ti. Sawrkar hmalakna hrang hrang tarlangin a ngaihna hria a hnathawhna hmunah hian hmasawnna duhawm tak a thleng thin a ni tiin miretheite chhanchhuahna atana sawrkarin a NLUP a ruahman hi a hlawhtlinna tunah hian kan hmu mek a, a dawngtute pawh hlawhtlin pui ngei tur pawh in a chah bawk. Khual zahawm chuan eng hna pawh thawk ila, a hmasa berah Lal Isua kan dah hi a pawimawh ber a ni tiin Lal Isua duh dana hna kan thawh phawt chuan malsawmna kan dawng ngei ang tiin kalkhawmte a chah bawk.
He Computerised Railway Ticket booking/Passengers Reservation System, Mamit hi Mizoramah Transport Department hnuaiah chuan a panga (5)-na a ni.
He hunah hian Shri B. Das, Asst. Commercial Manager, NF Railway, Lumding Division leh Pu L.T. Zodinliana Station Superintendent, Railway Out Agency, Aizawl ten report an pe a ni.
He Passenger Reservation System hawnnah hian Pu Rodney L.Ralte, IAS, DC, Mamit pawhin thu a sawi bawk a ni.
Pu John Rotluangliana Deputy Speaker, chuan a hmasa atan Reservation hi a hmingin a ti nghal a ni.
Hemi hunah hian Mamit a Heads of Offices leh khawtlang hruaitute an tel tha hle a ni.
