No.2001/2021-2022

Aizawl the 26th August, 2021 : Vawiin khan Cooperation Secretary Dr. Lalzirmawia Chhangte, IAS, chuan a Office Chamber, MINECO-ah District Cooperative Office, Aizawl West District hnuaia Van Dhan Vikas Kendra Cluster (VDVKC) pahnih - Sand Labour Cooperative Society Ltd., Sairang leh Village Farming Cooperative Society Ltd., Thiak hruaitute hnenah Nimbu Hand Press Juicer, avaiin Juicer 300, a hlan a. Hemi rual hian heng VDVKC pahnih tan hian Deep Freezer (500 lts) 3, Syntex (500 lts) 4 leh plastic bottle, avaiin 10,000, a hlan nghal bawk a ni.

Juicer leh hmanraw dangte hlanna inkhawm tawi neihah Dr. Lalzirmawia chuan Mizoram-a Van Dhan Mission (PMVDY) kalpui a nih dan tlangpui a sawi a. Vandhan hi Minor Forest Produce (ramngaw hnuaia thei leh ngaw chhung hausakna) hmanga thingtlang mipuiten ei bar an zawnna tur Sawrkar laipui Scheme a ni a, ramngaw tichhe lova a chhehvel leh a chhunga thlai, thei leh ram hnim hlutna neite sengkhawma suma chantir theih tura sawngbawl hi a ni tih a sawi. Vandhan Mission hi TRIFED, Ministry of Tribal Affairs, GoI hnuaiah kalpui niin Mizoram-ah chuan Cooperation Department hi Nodal Department niin Mizoram-ah VDVKC 159 din a nih tawh thu leh hrileng karah theihtawp chhuah a, heng VDVK SHG hnuaia kuthnathawktuten eibar zawnna mumal an neih theihna turin Cooperation Department-in hma a lak mek thu a sawi bawk. Tunah hian VDVKC engemawzat tan hmanrua chi hrang hrang, Aieng herna khawl, Hmarcha herna khawl, Sawhthing herna khawl te pek a nih tawh thu leh tun atanga hun reiloteah kuthnathawktute hian a hlawkna an tel thuai tur thu a sawi a ni.

Vawiina hmanraw hlanna inkhawmah hian Pu Lalrinsanga, MSCS, Registrar of Cooperative Societies leh Cooperation Department hotute an tel bawk a ni.