2046/2022-2023

Aizawl 23rd September 2022: Vawiin khan Hlimen Local council house ah Primary Agriculture Credit Co-operative Society Ltd (PACS) Hlimen chu Cooperation Minister Pu C.Lalrinsanga'n a hawng.

Cooperation Minister Pu C.Lalrinsanga chuan thusawiin," Hlimen khuaa PACS din theih a,a awm chu lawmawm a tih thu sawiin Dikna leh rinawmna nena theihtawp chhuaha mahni ta anga ngai turin PACS hmangtute a chah a, Khaw inlungrualna apiangah PACS hlawhtlinna kan hmu a ti.

India ramah PACS hi Bank țhenkhat aia a len zawkna hmun a awm thu sawiin tu tan pawh PACS chu chhawr theih a ni a, kuthnathawktute tan chhawrna awm tak Bank-tê a ni a ti. Kan thlai thar hralhna leh kan sum thawhchhuah ang angte PACS ah dah țhatna chang hria ila, tlem te te a kan pawisa tlingkhawm PACS kaltlanga kan dah țhat lo pung ve hret hret chu tangkai zawkin kan hmang thei dawn a ni a ti.

Cooperative movement hi ram hmasawn nan a pawimawh a, Hlimen khuate chu Cooperative Society lian zawk din turin a chah bawk. Mizoramah ngei pawh Cooperative movement chak taka kalpui an awm tawh tih sawiin Society in Eichawp dawr te, Damdawi dawr mai bakah Hardware dawrte thlengin hmun țhenkhatah chuan hlawhtling takin kalpui a ni, Țanrualna leh thawhhona țha nen Cooperative society hi kalpui a nih chuan mipuite hmasawnna thlentu tur pawl pawimawh tak a ni thei a ni a ti bawk.

Minister chuan Agriculture hnuaia Loneitute tana chenfakawm tur Sawrkar laipuiin hamțhatna a siamte mipui ngaihven a hlawh tawk lo deuh tih sawiin Farmers pension scheme PM-KISSAN chhawr țangkai turin kal khawmte a chah a. Common Service Centre hnai bera in register thar leh turin a ngen a. Kut hnathawktuten Kum 60 an kai huna, Pension Rs 3000 zet thlatin an lak theihna tur scheme tha a ni a ti bawk.

Pu C.Lalrinsanga chuan Organic Leițha siamna tur 'Bio Fertilizer Production Laboratory' ,Neihbawih rama sak chu hawn theih a peihfel tawh a nih thu a sawi a.Thlai eichhetu rannung, rannung hmang veka thahna Bio Control laboratory Unit, Lengpuiah sak zawh țep a nih thute, Thingdawla tissue culture hmanga Alu chi tihpunna tur buatsaih mek a nih thute a tarlang bawk.

PACS hawnna inkhawm hi Pu C.Lalhmingliana Chairman,PACS Hlimen in a kaihruai a, Pi Lalhmunsiami Resources Person, Apex Bank in PACS nihphungte sawifiahna hun neiin Zaliankhuma Jt Registrar Mizoram Cooperation Department in thusawina hun a hmang bawk a ni.

PACS hi Mizoramah kum 2012 khan bul țan a ni a, tun dinhmunah Mizoramah țha taka kalpui thei PACS 34 an awm tawh a ni.

Attachment

  • Loading attachment...