2047/2022-2023

Champhai, the 23rd September, 2022: Vawiin chawhma dar 10 khan District Institute for Education and Training (DIET) Champhai buatsaihin Champhai District chhunga Primary leh Middle School Zirtirtute tan Cyber Crime chungchang inzirtirna neih a ni.

He hun I&PR Auditorium, CHANEM-a neih hi  Training Co-ordinator Pi Vanlalruati, Lecturer, DIET Champhai chuan kaihruaiin, Pi Rebecca H. Hnamte, Principal, DIET Champhai chuan kalkhawmte lawmna thu a sawi a. Nikhat chauh an training dawn avangin an thil zirte uluk taka chhinchhiah a, midangte zirtir chhawng thiam thei tura ngaithla uluk turin a kalkhawmte a chah a ni.

Resource Person Pu C.Lalengliana, Addl.SP Champhai chuan Information Technology thang chakin a rawn ken tel chu cyber crime a nih thu sawiin, helama thiamna a san ang zelin cyber crime pawh hi a pung chak a ni, a ti a. Kumin chhungin Mizoramah Cyber Crime case 400 chuang ziahluh tawh a nih thu leh pawisa lam kaihhnawih a tam ber thu a tarlang bawk a. Zirtirtu kalkhawmte chu computer leh mobile phone-te bakah software-te thlenga hman dan zir chhunzawm peih turin a chah a. Cyber crime lama humsual lo dai palhte pui thei tura inzir zel turin a chah bawk.

He hunah hian cyber crime chungchanga hriat tur pawimawhte, electronic hmanga inbumna hrang hrangte laka inven dan tur leh hremna tawh theih dan hrang hrangte kalkhawmte zirtir an ni a. Case study-te neih nghal a ni bawk.

DIET Champhai buatsaih Primary leh Middle School Zirtirtute puala Cyber Crime chungchanga hriattur pawimawh inzirtirna hunah hian Zirtirtu 100 bawr vel an tel thei a ni.