Cooperation Department changtu Minister Pu Lalrinmawia Ralte hovin vawiin khan Synod Conference Centre-ah Mizoram State Cooperative Marketing and Consumers' Federation (MIZOFED) Ltd. Annual General assembly vawi 20-na hman a ni a, Mizoram hmun hrang hrang atang MIZOFED a thawktute leh shareholders te an kalkhawm a ni.

Pu Lalrinmawia Ralte chuan khawmpui palai kalkhawm hmaah thu sawiin MIZOFED leh an hnuaia Cooperative Society te chu Mizorama cheng mipuite tana rawngbawltu an ni a, Mizoram chhung leh pawn lama harsatna a thlen changa sumdawng ten an bungrua leh thil zawrh chheprelh a ni hnih/thum hnu a man to tak tak a hralh ching an awm thin chang pawha mipuite harsatna phuhru tur, man tlawm leh man man zawka an thil zawrhte mipui hnena chhawpchhuak reng thin tu an ni a, diklo taka thil man to thut thut vengtu pawimawh tak an ni a ti bawk. UNO in kum 2012 atanga "International Year of Cooperatives" a hman tan atang khan khawvel pumah Cooperative Society te hian ngaihven an hlawh thar nasa a, khawthlang ramah phei chuan Cooperative Society ten hna an thawk tha em em a, keini pawhin kan rilru dah sang ila, hmangaih tak leh neitu nihna thinlung tak tak pu in hna thawk ila chuan Public leh Private Sector ten Mizoramah hma rawn la lo mahse Cooperative Sector hmangin kan dingchhuak thei chiang a ni a ti a, chumi tur chuan mipuite pawhin min hriatchian a ngai a, abik takin thalai lehkhathiam ten Coperative Sector hi an tuichilh a pawimawh takzet a ni a ti bawk.

Mithiamten an zirchianna ah sap rama Cooperative Society te tlo na leh hlawhtlinna chu an dawr kaltlanga an khawtlang tana thil tha tih duhna thinlung an put vang a ni tih an hmuchhuak a, mipuiten anmahni thatna tura tangruala, khawtlang leh hnam hmangaihna nena din ani tih an hriat avangin an ngaipawimawh a, an tlo bawk a ni a ti a, amaherawhchu Society member intelkhawmte zingah mi rinawmlo leh phakar bik an awm hian a pawi thui thin a, lang tlang tak leh inring tawn chunga thawhhona tha an neih a pawimawh ber a ni a ti bawk. Minister hian Shareholders te pawh tim lova share lei belh tura ngen in kan tanrualna avanga hlawhtling tur kan ni tih i hre thar leh ang u tiin a chah a ni.

MIZOFED hian hmalakna hlawm lian pui pui pathum - POL a sumdawnna, LPG a sumdawnna leh Consumer & Essential Commodities a sumdawnna an nei a, an Annual Report 2015-2016 a a lan dan in MIZOFED hian Mizoram chhung hmun hrang hrangah Petrol Pump 7 a enkawl mek a, Aizawl, Lunglei, Kolasib, Champhai, Vairengte, Lawngtlai leh Hnahthialah Petrol Diesel hralhchhuahna Retail Outlet neiin kum 2015-2016 chhunga POL atanga an sum hlep chu Rs. Nuai 258.87 a ni a, Mizoram chhunga Oil Business-a 60% vel an khawih a, tun kum kal mekah hian an Petrol Pump zawng zawngah Oil Stock na tur under-tanky phum belh vek an tum bakah Petrol Pump tihchangtlunna tur ruahmanna chi hrang hrang an siam bawk.

Liquified Petroleum Gas (LPG) a sumdawnna ah MIZOFED hian Aizawl, Serchhip, Mamit, Champhai, Kolasib leh Saiha ah te LPG Distributorship nihna an nei a Mizoram pumah tun dinhmunah Consumer 71226 (Double Connection 45835, Single Connection 25391) neiin LPG atanga kum 2015-2016 a an sum hlep chu Rs. 72,49,619/- a ni. Consumer & Essential Commodities bikah chuan Ruchi Soya Industry Ltd. leh Gujarat Coop. Milk Marketing Federation ten Distributor ah an hmang a, Social Welfare Department hnuaiah Nutrition Supply tu an ni bawk a, tunah hian Gujarat Coop. Milk Marketing Federation kaltlangin Amul Products chi hrang hrang Amul Gold Bawnghnute, Butter, Amul Cool leh thil dang engemawzat la lutin Serchhip District atan bika Distributor an nih angin Serchhip atang an pe chhuak a, tunah hian Buhfai, Dal leh Chini la lut thei tura hma lak mek a ni bawk. Aizawl ah hian Consumer items hralhchhuahna dawr hmun li - Bawngkawn, New Market, Treasury Square leh Tuikual ah neiin Serchhip leh Lungleiah an nei bawk a, kum 2015-2016 chhunga Consumer & Essential Goods a an sumdawnnaa sum vir vel hi Rs Nuai 1771.81/- a tling a ni.

MIZOFED hian POL phurtu Tank Lorry 6 neiin Private Motor Tank Lorry 38 an chhawr tel a, Gas Phur motor LPG Truck 2 neiin mimal gas phur motor LPG Truck 4 an chhawr belh bawk a, hei bakah hian Gas sem kual turin 407 Truck 3 leh Pick-Up 1 an nei bawk a ni.

MIZOFED ah hian thawktu nghet mi 92, Muster Roll 46 leh Contract-a rawh 15, an vaiin mi 153 an awm mek a, tunah hian New Secretariat Complex ah Office Building thar sa mekin kumin kum tawp lamah chuan luah theih an inbeisei bawk. MIZOFED hian Shareholder Cooperative Societies 317 tun dinhmunah a nei mek bawk a ni.

MIZOFED khawmpui chawhma inkhawm hi Pu K. Laldawngliana, Chairman, MIZOFED Ltd. in kaihruaiin Pu Sangdingliana, IAS, Registrar, Cooperative Societies in fuihna thu a sawi a, Pi Lalfakzuali, Managuing Director, MIZOFED Ltd. in Annual Report pe in Pu H. Thangrenga, Vice-Chairman, MIZOFED Ltd. in lawmthu sawina in hnu a khar a ni.

Chawhnu lamah Pu K. Laldawngliana, Chairman, MIZOFED Ltd kaihhruaina hnuaiah rorel inkhawm neiin Annual Audited Balance Sheet 2015-2015 pharh a sawiho hnu ah pawm a ni a, Annual Budget 2016-2017 pawh sawiho a pawm a nih bakah Bye-Law Amendment leh Mizoram Cooperative Societies Act 2006 Amendment chungchanga rawtna sawiho a ni bawk.