Health Minister Pu Lal Thanzara kaihhruai na in vawiin khan a Office ah Mizoram Institute of Medical College (MIMER) chungchang leh hemi behbawma thu pawimawh tak tak sawia meeting neih a ni.

Mizoramah Medical College din tura hmalak mek anih vangin Health & Medical hotute nen remruata inhmuhkhawm fo a ngai in la inhmuhkhawm zel pawh a ngai ang tiin Pu Lal Thanzara chuan ram tana pawimawh tak ngaihtuah uluk ngai a nih avangin a tir atanga ngaihtuahna hman that a ngaih thu a sawi a. Falkawn leh Cancer Hospital ah te thawhho dan turah naktip mai Sunday hian mikhual pawimawh tak Pu Ramesh Gupta, Managing Partner, Transnational Digital Health Care LLP Gurgoan leh Indo Canadian Consortium atangin Canadian mi pathum te an lo zin dawn a. Chumi atana lo dawnsawn dan tur leh an inbiakna tur atana tul tur te lo inbuatsaih a ngaih thu leh Medical College dinna turah pawh hian enge inpuihtawn theihna tur awm thei a, engtianga hmalak tur nge tih leh Mizoram tan tangkaina leh hlawkna a awm thei a ngem tih te pawh thlir thiam a ngaih thu a sawi bawk.

Vawiina meeting-ah hian Medical College din na tur atana ruahmanna bawhzui mek tawh leh la buaipui tur chungchang te sawi ho a ni a. Duhna avang leh hmanhmawh avanga kalpui vut vut chi ani lo va, Medical Council of India in a approved zel a ngaih bakah Ministry of Health & Family Welfare leh Mizoram sorkarah te tihtur tam tak a awm avangin hmachhawp a la tam thu te sawiho ani. Thil pawimawh tak tak pathum a awm a, chungte chu a ruangam te, bungrua pawimawh te bakah thawktu tur hrang hrang atan Mizoram chhung atanga tih theih vek anih dawn loh avangin States pawn lam mi thiam te pawh mamawh an ni dawn a. Chumi atana hmalak tawh dan te sawiho a ni a, ruahmanna hrang hrang te thlirho zui ho nghal a ni.

Vawiin meeting ah hian Dr. K. Ropari,Principal Director, H & Family Welfare Deptt. leh Health Department Officer te an tel kim hle a ni.