Mizoram State Cooperative Union Annual General Assembly vawi 29-na chu vawiin chawhma dar 11:00 khan Synod Conference Centre ah neih a ni a, Cooperation department changtu Minister Pu Lalrinmawia ralte chuan khuallian niin he hun hi a hmanpui a, Pu Sangdingliana, IAS, Registrar, Cooperative Societies chu khualzahawm a ni.

Khuallian Pu Lalrinmawia Ralte chuan khawmpui palai kalkhawm hmaah thu sawiin mihringte hi khawvela kan damrei chhung chhut a buai tur kan nil ova, kan hun neih chhunga kan thil tih hi kan damrei chhung the nan kan hmang zawk tur a ni a, midangte tan malsawmna ni a thil tha a tam thei ang ber hnutchhiah hi kan thupui ber ni se ka duh ber a ni a ti a, Cooperative Society te chu midangte tana malsawmna nih tum turin a chah. Khuallian hian Cooperative Principle chu thawhhona tha anih avangin a zozia ngawih ngawih a, indawmchhuak tawna hmasawn za tura thawhhona tha neih chu an thupui ber tur a ni a ti a, YMA leh Kohhrante hian Cooperative Principle entirna tha tak min pe a, memberten tangrual leh rinawm taka pawisa an thawh khawm kha an pawl hmasawnna leh memberte tana tangkai anih bakah midangte, mi harsa leh tanpui ngaite tanpuina atana hmangin an luangchhuak leh thin a, Cooperative Society member te pawh hetiang pawla tel vek an nih avangin Cooperative Society anga an thawhhona kawngah pawh harsatna a awmlo tura a ngaih thin thu a sawi.

Khuallian chuan Mizoramah Pulic Sector Enterprise leh Private Sector Enterprise lian mipuite hamthatna tham tak tak thlentu an la awm rihlo a, a awm lawk pawhin a rinawm loh a, chuvang chuan Cooperative Society te tan hmalakna tur hun remchang leh tha a tam a, kawng a in hawng zau hle a ni a ti a, keimahni theihna tawk te te mil a, duhawm lutuk lova rinawm taka thawhhova Cooperative Movement tih chak hi Mizoram innghahna ber tur a ni a ti a, Private Sector ho phei chu eng anga lian pawh ni se tlu chhe theilo tak tak an awm lova,ram leilung fa, kan dinhmun hrechiangtu intelkhawm “Cooperative Society” te hian tih tur leh mawhphurhna lian tak kan nei a ni a ti bawk. Pu Rinmawia hian Cooperative Society lem lutuk leh thawk thalo te chhuichhuah zung zung a tihtawp tul a tih thu leh a titha peih leh thahnemngai tak tak te vulh a tih chak zel an pawimawh thu a sawi bawk. Cooperatiove Society hnathawh leh tangkaina te mipuiten an la hre tam tawk lova a hriatthu sawiin mipuite nen tha lehzuala an indawrtawn a tul a, hetih kawngah hian tan lak thar hle a ngai a ni a ti bawk.

Mizoram State Cooperative Union Ltd. hi March ni 29, 1975 a din niin tun dinhmunah thawktu nghet 29 leh Muster roll a thawk 3 an nei a, contract basis a thawk tur Cooperative Education Instructor 3 la tharin Mizoram District tinah Cooperative Education Instructor dan an nih theih na kawng an dap mek a ni. Mizoram State Cooperative Union ah hian Cooperative Society 1400 chuang an awm a ni.

Vawiin Annual General Assembly hi Pu Lianthangpuia, President, MSCU Ltd. In a kaihruai a, Pi Maria G. Ralte, Chief Executive Officer in Annual report pe in Pu K. lalnunpuia, Vice-President, MSCU Ltd. In lawmthu sawina hun hmangin hnu a khar a ni.

Chawhnu lamah rorel inkhawm neih niin kum 2015-2016 Annual report thlirho anih hnu ah pawm a ni a, kum 2014-2015 Annual Audited Financial Statement an thlirho bakah kum m2015-2016 Annual Financial Statement an pawm nghal bawk a. Kum 2017-2018 atana sum hman tur ruahmanna Budget Proposal pawh sawiho anih hnu ah an pawm bawk a ni. Hei bakah hian MCS Act leh Bye-Law ennawn ngai te ennawn sawiho niin siamthat ngaite an siamtha bawk a ni.