2674/2022-2023
Dated Aizawl the 15th November 2022: Vawiin khan All India Cooperative Week vawi 69-na chu Vanapa Hall-ah neih a ni a, Cooperation Minister Pu C. Lalrinsanga chu khuallian niin a hmanpui a ni.

Khuallian Pu C. Lalrinsanga chuan thusawiin, ram sum leh pai dinhmun hmasawn zelna turin Cooperative Movement nasa zualin kalpui a ngai a, ram ropui leh changkangah te pawh Cooperative Movement mumal takin an kalpui a, ei leh bara intodelhna thlentu a ni hial thei a ni a ti. Minister chuan Cooperative Society leh Movement darhzau leh than zelna tur ngaih pawimawh a hun hle tawh a, a dan siamah chauh duhtawk mai lovin, midangte tan zirtirtu leh entawn tlak nih a ngai a ni a ti bawk. Cooperative nihphungah chian hmasak a tul a, chu chuan movement tha a thlen dawn a; mimal hlawkna leh thanna chauh ni lo a, ram hmasawnna leh changkanna thlen thei ‘Cooperative Movement’ dik leh tha tak kalpui ngei turin a chah.

Minister chuan Cooperative Department, Federation leh Society te inkarah thawhhona tha a awm a tul thu sawiin, harsatna a awm chang pawha dawhkan khat kilho thei nih a ngai a; ram leh hnamin hmasawnna tha leh rahbi dik a rah ve theihna turin Primary Society hrang hrangte hnenah zirtirna tha pek a ngai ni a ti. Mizoramah Cooperative Movement hlawhtlinna turin Cooperator-ten mawhphurna sang tak an neih avangin theihtawp chhuah turin a chah a ni.

Khuallian Minister Pu C. Lalrinsanga chuan ‘Mizoram Cooperative Tlangau’ Special Issue chu a tlangzarh nghal a. Vawiina All India Cooperative Week hawnna inkhawm hi Mizoram State Cooperative Union President Pu K.Lalchamreia chuan kaihruaiin, Pu Vinay Kumar, IAS, Registrar, Cooperative Societies, Mizoram chuan lawmthu sawiin hun a khar.

All India Cooperative Week hi India Prime Minister hmasa ber Jawaharlal Nehru hriatreng nana hman niin, kum 1953 atang khan hman tan a ni. Kumin atan hian ‘Growth of Cooperatives and Future Ahead’ tih chu thupuiah hman a ni a, ni 14-20 November chhung a awh dawn a ni.