Cooperation Minister Pu Lalrinmawia Ralte chuan vawiin khan MULCO-in Lungdai Milk Producers’ Cooperative Society-te hman tura an sak, bawnghnute dahkhawlna ‘Bulk Milk Cooler’ chu NLR Hall, Lungdai-ah a hawng a; bialtu MLA Parliamentary Secretary Pu Hmingdailova Khiangte chu he hunah hian Khualzahawm a ni bawk.
Bulk Milk Cooler hawnna inkhawm MULCO Chairman Pu Vanlalchhunga kaihhruaiah Khuallian Pu Lalrinmawia Ralte chuan Mizoram-ah cooperative society a hlawhtling thei lo tih ngaihdan a awm laia Lungdai khaw mipuiten NLUP hnuaia an trade thlan bawngvulh an hlawhtlinpui chho ta zel hi an chhuanawm hle tih a sawi a. Khawvel ramdangah te sumdawnna lian tak tak an tlakchhiat lai pawhin cooperative society anga sumdawnna erawh a ngai rengin a kal thei thin thu tarlangin Minister chuan Mizote pawhin cooperative society kalphung thatzia leh hlawkzia kan hrethiam telh telh a, thawhhona tha leh tanlak hona atanga hlawhtlinna a hmuh theih a ni tih kan hrethiam tan ta hi a lawlawm hle a ni, a ti. Lungdai chu ‘khaw intodelh’ tia hriat a ni chho zel a, sorkar leh pawl hrang hrangte pawhin tanpui an chak a, a khua mipuiten dil ngai lovin sorkar pawhin a rawn ngaihsak mai a ni tiin entawntlak a tih thu a sawi.
Khual zahawm Pu Hmingdailova Khiangte pawhin thu sawiin ram intodelh tur chuan taimakna leh huaisenna a ngai a, chumi atan chuan Mizote pawh kan inbuatsaih chho mek a ni, a ti. Mizorama HIV/AIDS darh chak thu tarlangin bialtu MLA chuan kalkhawmte chu hriselna lamah pawh tan la zel tur leh fimkhur turin a chah.
MULCO Managing Director Dr.Lalremliana’n Report-a a tarlan danah bawnghnute dahkhawlna hi Indian Dairy Machinery Company Ltd., Gujarat siam niin bawnghnute 1000 lts a dawng thei a; kawlphetha awm loh huna hman turin diesel generator 10KVA a keng tel bawk. He khawl hi bawnghnute sawr hlim, sawngbawlna hmun thlenpui hmaa a chhiat mai loh nan leh a quality vawn that nan lo dah khawlna leh dah vawhna a ni a. He khawl hian bawnghnute hi 40C aia sang lovah vawng daiin a vawng tha thin a, hei hi a phurhna tur bik motor (Road Milk Tanker) hmangin MULCO Dairy Plant, Thuampui-ah phurh thlen thin a ni. Tun dinhmunah hian MULCO hmalaknain Bulk Milk Cooler hi 7 - Serkhan, Serkhan ‘A’, Lungdai-ah 2, Sihphir-ah 2 leh Aibawk-ah bun tawh a ni.
