Vawiin khan Mizoram Apex Handloom and Handicraft Cooperative Society Ltd. (MAHCO) chuan I&PR Auditorium-ah General Assembly vawi 38-na an hmang a. Cooperation Minister Pu Lalrinmawia Ralte chu khuallian a ni.

Pu Lalrinmawia Ralte chuan Mizo puantah thiamte kut chhuak mawi tak hi pholana  chawilar thiam a tul tiin kut ni vang thla chauh emawa phawrh lo hian hmun tinah darh sela, a duh apiangte pangah phe sup sup sela, an inngaihsan siak emaw tih mai tura  khawvel hmun danga tribal-te incheina a darh mek lai hian Mizo hnam incheina hi khawvel hmun dangah chawilar ve kan tum tur a ni, a ti a. Kan roh luattukna lamah a lar lo zo vang tih a hlauhawm a, thawnchhuah tham a lo nih theih nan kan tlangzarh tam, kan hman tam leh hmun tinrenga kan tarchhuah a tul a ni, a ti. Minister chuan tun dinhmunah hlawkna tel tur a awm nghal mai loh avangin MAHCO a inziaklut shareholders an tlem hle a, amaherawhchu hlawkna tel tur awm rih lo mahse tun ang zela kan hnam thil te a lar chhoh chuan MAHCO hian hmabak eng tak a nei tih hriain hmalam hun thlira he pawla inziaklut zel tur hian puantah leh thiamhnang deh lam thiamte a sawm a ni.

Cooperation Secretary Pu Jack L.Darkim pawhin thusawiin MAHCO dawmkanna turin National Cooperative Development Corporation (NCDC) atangin cheng nuai 160 dawn sanction a ni a, sawrkar kaltlanga release mai tur a ni. a ti. Khawvel hmasawnna in a ken tel thil tam tak zingah incheina pawh a tel ve a, khawvel hmun hrang hrangah thawmhnaw siamtu company te an lian thur thur ang hian MAHCO pawhin hmakhaw eng tak a nei a ni, a ti a. Mizo puan hi a mawi a, miin an duh hle lai hian ramdanga thawnchhuak thei tur chuan kan kutchhuakte hian belhchian a dawl tur a ni, a ti a. Tunah hlep neilovin kal mahsela, thahnemngaihna nen tangruala tha an thawh thar phawt chuan hmabak eng tak an nei, Secretary chuan a ti bawk.

Kum 5 chhung atana thlanchhuah Board of Directors mi panga te bakah sawrkar ruat Registrar Cooperative Societies, Industries Director, CEO Mizoram Cooperative Apex Bank Ltd. leh MAHCO Ltd. Managing Director te chuan MAHCO hi an enkawl a. Thawktu regular 9 leh Muster Roll 3 an nei mek. Puan tahtute mamawh La chi hrang hrang te, puan tahsa lakkhawmte bakah puantahtuten man man zawka an lei theih tur loom parts-te an zuar a ni. Handloom Cooperative Society 194 awm mekah tun dinhmunah MAHCO a inziaklut chu 77 an ni a. Cooperative Societies-te share thawhkhawm hi cheng nuai 1.20 a nih laiin sorkar share thawh zat chu cheng nuai 37.80 a ni.

General Assembly hi MAHCO Chairman Dr.Zohmangaiha chuan a kaihruai a. MAHCO Managing Director Pi Lalfakzuali’n 2014-2015 chhunga an pawl chet vel dan a report a. Mizoram hmun hrang hrang atanga MAHCO shareholders kalkhawmten nilengin inkhawmpui hi an hmang a ni.