Disaster Management & Rehabilitaion Minister Pu C.Ngunlianchunga chuan vawiin chhun khan Hunthar Veng kawngpui lei tlahniam a hmuna tlawhin a enfiah a, lei tlahniamin harsatna a siam bawhzui dan tur te khawtlang hruaitute nen an thlir ho. Minister chuan lei tlahniamin kawngpui a tihchhiat chu kawng pawimawh, Aizawl khawpuia chengte chak lakna kawng ber a nih avangin a rang lama siamthat a nih theih nan DC, DM&R, PWD, UD&PA leh Traffic hotu te nena hmunah ngei an enfiah thu a sawi a. DM&R Department chuan theihtawp chhuahin lei tla hniam leh kawngpui siamthat nan National Disaster Management Authority ah Concept Paper a thehluh tawh thu a tarlang bawk. Helai hmunah hian mi thenkhatin leivung an paih thin chuan a thlanga chengte tan a hlauhawm bakah lei tawlh a siam belh avangin mi tumahin helai hmunah hian leivung paih tawh lo turin Minister chuan mitin a ngen bawk. Helai lei tlahniam avanga harsatna sutkian dan tur te chu Chief Minister hova sawihovin hma lak thuai a nih tur thu a sawi lang bawk.

Minister hian lei tlak hniamna hmun hi chipchiar takin a fang kual a, tui luang lut reng paihna tur drainage siam leh a thlang lama lei tawlh danna tur check dam siam dan tur te an en ho a ni. Minister hi DM&R Principal Secretary Pu P.C.Lallawmsanga, Aizawl DC Dr Franklin Laltinkhuma, DM&R Director Pu C.Lalpeksanga, Traffic SP Pu Lalthanmawia, PWD S.E. Pu Lalruata Sailo leh UD&PA officials leh engineer ten an tawiawm a ni.