Mizoram Governor Lt. Gen. (Retd) Pu Nirbhay Sharma chuan vawiin khan Zokhawthar Land Customs Station leh 10th Assam Rifles hmunhma enfiahin thawktute leh khawtlang hruaitute kawmna hun a hmang. Governor hian nimin (25.6.2015) khan Champhai thlengin, Champhai Circuit House Conference Hall-ah Sorkar Department hotute kawmna hun a hmang a. An department chan theuh hnathawh leh hmalakna te chipchiar taka a sawipui hnu in Champhai DC, SP,  Assam Rifles leh BRTF Commandent te a hranin kawmna hun a nei leh a. Hemi hnu hian Govt. Champhai College Auditorium-ah ropui takin amah lo hmuahna hun hman a ni.

Governor chuan Mizoram chu ziak leh chhiar thiam tamna State a nih angin hmasawnna kawng hrang hrangah chak zawk a ram a kal theih nan eizawnna kawng hrang hrang thawk thei tura mimal chhawr tlak a chher chhuah chu a pawimawh ber thu a sawi a. Hmarchhak state dangte nen khaikhin in Mizoram chu hmun sang tak thleng thei turin malsawmna tam tak a dawn thu tarlangin, chu a theihna chu a taka chantir tur chuan tan rual pawimawhna leh sorkar hmalaknaa kohhran leh tlawmngai pawl nena thawhhona tha neih a tul thu te a sawi a. Zirna kawnga titha state nih mai duhtawk lo turin Mizoram chu a duh thu leh, chhawrtlak thiamna siamchhuah a, hriselna kawnga hmasawnna hmuh theih neih chu a thil vei ber te zing a mi a nih thu Governor chuan a sawi.

Governor chuan Champhai chu ramri dep a awm a nih avangin Mizoram hmasawnna leh than zelna atan hmun pawimawh tak a luah thu a sawi a. Champhai District ram thleng chu a pianto-ah a mawisa vangin khualzinmite hip thei tura ruahmanna siam a pawimawh thu sawiin, mi tam takte eizawnna kawngka inhawn theihna anih thu a sawi a.  Champhai District chhungah buhbal chinna hmun tha tak tak a awm laiin tuna buhbal thar chhuah chu a beitham deuh nia a hriat thu leh tunlai thiamna hmanga nasa zawka tan lak a nih theih chuan intodelhna tham thar chhuah theih a beisei thu a sawi a ni.

Champhai College Auditorium a Governor hmuahna, Champhai DC Pu H. Lalengmawia’n a kaihruai a. Sorkar Department leh khawtlang pawl hrang hrang aiawhin thilpek hlan a ni a. Hemi hnu hian Governor chuan Tlangsam Winery, Champhai District Hospital leh Champhai a Assam Rifles hmun a tlawh a.

Tukin zing khan Governor hian Champhai Circuit House kawtah Environment & Forest bultumin thing a phun a Vawiin Zokhawthar Land Customs Station a tlawh hnu hian Rih Dil a tlawh tel a. Mizote tana hmun pawimawh a ni tih a hriat thu a sawi a ni. A chhuahnaah Governor hi Champhaia sorkar department hotu thenkhatin an tawiawm a ni.