934/2022-2023
Aizawl the 17th June, 2022 : Vawiin khan Mizoram State Cooperative Marketing & Consumers Federation (MIZOFED) chuan an annual General Assembly vawi 24-na chu Cooperation Minister Pu C Lalrinsanga hovin Synod Conference Centre, Aizawlah an hmang. MIZOFED Chairman kalchhuak leh MAMCO Chairman Pu K Laldawngliana, MLA pawhin he hun hi a hmanpui a ni.

Cooperative Movement hi movement pawimawh, Kristian nun nen phei chuan inrem em em a ni, Pu C Lalrinsanga chuan a ti a. Isuan van a lawn hnua zirtirte leh ringtu hmasa ber te khan cooperative movement hlimthla an lo entir deuh tawh a ni, a ti. Pu C Lalrinsanga chuan cooperative movement hi a rau dik taka kalpui chuan kan ram economy hian hma a sawnpui dawn tih a chiang, a ti a. Mahni chauha tih theihloh thil tam tak hi midangte nena thawhhona atang chuan a tih theih a, amaherawhchu hlawhtling tak tak tur chuan rinawmna a pawimawh, a ti. Minister chuan Cooperative movement min hruaitu atan Kristianna hmang ila, tun aiin nasa takin hma kan sawn ang, a ti a. Kan ram hmasawnna rahbi chak taka pen a, tlanpui tur chuan kan vaiin mawh kan phur tiin mahni mimal hlawkna chauh ni lo, a huhoa hlawkna kan thlir a ngai a, mimal ang chuan hlawkna kan tel theuh dawn tho tih hre turin kalkhawm te a chah a ni.

Agriculture Minister ni bawk Pu C Lalrinsanga chuan MIZOFED hi Agriculture Department chuan channelizing agency ah hman an tum thu a sawi a. Ei leh bar lei leh hralhna tur Supply Chain atan roadmap duan mek a ni a, thui tak an kalpui tawh a ni tih Pu C Lalrinsanga chuan a sawi a ni.

Hripui len hnuah tun tum hi MIZOFED in general assembly an neih theih leh hmasa ber a ni a. Kumin hi an kum 40 tlin kum a ni. MIZOFED hian thuang thumin sumdawnna an kalpui a. POL division, LPG division leh Essential & Consumer (E&C) Division te an ni. Kum 2021-22 chhung khan POL Division hian cheng nuai 17363.69 man hu an hralh chhuak a, LPG Division hian cheng nuai 4108.54 man hu an hralh chhuak a, E&C Division hian cheng nuai 1793.96 man hu bungrua an hralh a ni.

MIZOFED hi board of directors enkawla kal an ni a. An Chairman chu Pu K. Rothangpuia a ni. Report petu Pu Lalrinzuala, Managing Director tarlan danin kum kalta leh kum hmasa chhung khan MIZOFED hian hmasawnna langsar thuang thum a nei a. A hmasa berah COVID total lockdown chhungin Vegetable Supply Chain buaipuitute zingah sawrkarin a telh a, ramri buai laiin Manipur leh Tripura ah tuialhthei leh eirawngbawlna gas phur hmahruaitu an ni. Pahnihnaah chuan New Capital Complex ah petrol pump thar an hawng a, NEC atanga sum an dawn hmangin ei leh bar supply chain ruhrel an buatsaih mek. Pathumna ah chuan MIZOFED inrelbawl dan leh sumdawnna kalphung a chhungril atanga siam rem chhoh zel a ni.

Vawiin programme hi MIZOFED Chairman Pu K Rothangpuia’n a kaihruai a. Pu Maria G. Ralte, Addl. Registrar, Cooperative Societies chuan thusawiin Pu Laldingliana Ralte, Vice Chairman MIZOFED chuan lawmthu sawiin chawhma hun tihtaqp a ni. Chawhnu ah hian thupui thlanbik hmangin rorel a ni a, District tin atangin palaite an kalkhawm a ni.