933/2022-2023
Suangpuilawn, 17th June, 2022 : Mizoram State Rural Livelihood Mission (MzSRLM) bultuma hmalakna "Lawntlang Juice Extraction Centre" (thei sawrna khawl), Suangpuilawn-a mi chu Assembly Speaker Pu Lalrinliana Sailo leh Rural Development Minister Pu Lalruatkima ten vawiin khan an hawng.

Centre hawnna inkhawm Suangpuilawn Community Hall-a buatsaihah khuallian Pu Lalrinliana Sailo, Assembly Speaker leh bialtu MLA ni bawk chuan theitui sawr chhuahte tlangzarhin thu a sawi nghal a. A bial chhungah hetiang khawl tangkai bun fel a ni chu lawmawm a tih thu sawiin, Suangpuilawn chu khaw taima an nih avangin an hlawhtlinpui ngei dawn tih a hriatchian thu a sawi a, Centre than zelna leh hmasawn zelna tura theihtawp chhuah a tum thu a sawi a ni.

Khualzahawm Pu Lalruatkima, Rural Development Minister pawhin thu sawiin Suangpuilawn khua in hmasawnna rahbi thar a chuangkai chu a lawmpui thu a sawi a, ramdang nen insumdawntawnna tur hmun hrang hrangah Border Trade Centre kan tihhlawhtling thuai dawn niin a lang a, hengte hi chhawr tangkai ngei tura tanlak a pawimawh a ni, a ti a. Thei rah sawr tur hnianghnar taka nei reng turin kuthnathawktute, thei rah chingtuten tan an lak sauh sauh a pawimawh a ni, a ti.

Pu Ruatkima chuan MzSRLM chuan thingtlang hmeichhiaten lei rem an rah theih nan hma an la tih sawiin, Self Help Group te hmalakna a zau em em a, kawng chi hrang hrangin eizawnna a thlan theih a, SHG hlawhtling tam tak entawn tur an awm tawh a ni, a ti a. Inkaihhruaina felfai, teirei peihna, rinawmna leh tumruhna nen hma lak a pawimawh tih sawiin SHG te chu hmalakna atana an loan pukte peipunga, a hun taka rul thin turin a chah a, loan an rulh that chuan an hlawkpui dawn bakah SHG dangte tan kawng an hawn sak thin a ni, a ti bawk.

Minister hian Lawntlang Juice Extraction Centre in an hman tur generator tha neih dan a ngaihtuahpui tur thu a sawi bawk a ni.

Suangpuilawn khua hian sapthei an ching nasa in an hlawhtlinpui tawh a, MIFCO, Chhingchhipah a tui sawr turin an thawn thin a, a hautak bakah harsatna an tawh thin avangin kum 2018 khan DoNER Ministry hnuaia North East Rural Livelihood Project (NERLP) kaltlangin theitui sawrna khawl dahna tur building sak a ni a, June ni 2, 2019 khan a sawrna khawl dah a ni a, kum 2019-a a tawp tak avangin he Project hi MzSRLM in a la chhawng a, hnathawk thei tura a khawl an bun fel hnuah Ministry of Science and Technology hnuaia Central Food Technological Research Institute, Mysore (CFTRI) mithiamten inkaihhruaina an siam zul zuiin theitui siam hi kalpui tan a ni a, CFTRI ah he khawl hmang tangkaitu Self Help Group (SHG) memberte training pek tura ruahmanna siam a nih laiin COVID-19 hripui leng avangin an in tir thei lova, online/video conferencing hmangin training hi in pek a ni a, bul tan nan MzSRLM hian cheng nuai 50 pe in a hman dan tur pawh felfai taka duan lawk sa a ni.

He Centre enkawl tur hian managing board din a ni a, anni hian inrelbawlna leh thil tul dang zawng zawng an ngaihtuah thin a ni. Theirah chi 3 - sapthei, lakhuihthei leh nimbu (a thur leh a al) an sawr thei tawh a, khawl vawi khatah litre 20 vel a sawr chhuak thei a ni.

Ruahman dan chuan Saitual district ah heng theituite hi hralh chhuah hmasak phawt a ni ang a, an hlawhtlin dan azirin district dang bakah Mizoram pawn thlenga thawn chhuak turin ruahmanna siam a ni a. He theitui sawr atanga hlawkna hmuh 10% hi khawl enkawltu Village Organization hnenah chhun luh tur a ni a, hei hi mahni intodelha inrelbawl thei tura ruahmanna a ni.

Suangpuilawnah hian SHG 21 awmin member 153 an awm a ni.

Lawntlang Juice Extraction Centre hawnna inkhawm hi Pu Benjamin Zalawma Ralte, Phullen BDO-in a kaihruai a, MzSRLM CEO Pi H. Lalchhandami'n technical report pe in, Managing Board aiawhin report a pe bawk a ni.