932/2022-2023
Siaha; the 27th June,2022 : Vawiin chawhma dar 10:30Am khan DPRC (SIRD&PR) Conference Hall, Meisavaih, Siaha-ah Mizoram Youth Commission, DC Office, SIRD &PR  te tangkawpa buatsaih Covid-19 pandemic vanga hmun danga inhlawh lo hawh (Returned Migrant Workers) te tana buatsaih Cement mistiri Training hawnna hun hman a ni. He hun Pu Donny Lalruatsanga,Addl.DC chuan kaihruaiin, Pu Lalsangliana, district bawrhsap chuan khuallian niin hun a hmanpui. Training hi North-Eastern Council,Shillong bultum a ni.

Khuallian Pu Lalsangliana chuan thusawina hun hmangin, hetianga Mizoram Youth Commission, DC office leh SIRD &PR te tangkawpin in Siaha thalai, hmun danga ei zawnga awm Covid-19 hripui avanga mahni hna kalsan a lo let te hmakhua ngaia training a buatsaih hi lawmawm a ti thu sawiin, Cement works hi hnam dang(Vai) ho tih turah chauh kan dah thin a, an aia tha in khawtual mi te hian kan thawk ve theih a ni. Chumi lantirtu tur chu vawiin trainees te hi in nih dawn avangin, rilru pe tak leh thahnem ngai takin Training u la, thiamna chhenfakawm pawchhuak ngei tur leh eizawnna ngelnghet in neih phah ngeina turin duhsakna ka hlan che u, a ti.

Pu Lalroliana Tochhawng, Trainer ,SIRD in Training course chungchang sawina hun hmangin, Cement mistiri hi ni 20 chhung training tur a ni a, Nitin Training chhung zawng hian stipend Rs.300/- an dawng dawn a ni.SIRD-DPRC a thleng duh te tan chuan ei leh in a thlawna tum sak vek an ni bawk ang, a ti.

Vawiin Cement Mistiri training-ah hian trainees 28 an awm a, ni 20 chhung an training dawn a ni.

Vawiin Training hawnna inkhawm chu Pu Lalphunchhunga,Head Faculty,SIRD,Siaha in lawmthu sawina in a khar ta a ni.