Vawiin chawhma khan Pu C Lalrinsanga, Minister, Cooperative Department chuan Office of the Registrar of Cooperative Societies, Babutlang a tlawh a, Agriculture Development Board member engemaw zatin tawiawmin Registrar of Cooperative Society office a thawktute leh ARCS Aizawl East leh West a thawktute an tel a ni.

Minister Pu C Lalrinsanga chuan Cooperative movement, mipui inthuruala hmasawn tuma hma an lakna hi, kan ram economy dawmkan nana hmanraw pawimawh tak a nih thu sawiin mipui thleng phak hmalakna reng rengah Cooperation anga hma lak a nih loh chuan hlawhtlin a harsat thu a sawi bawk a ni. Minister chuan Cooperation department a thawktute chu Mizoram hmasawn nana an pawimawh zia hriain tuna Mizoram State, District leh Primary level Cooperative society hrang hrang, mizo mipuiten tangkai taka an chhawr mek  te enkawl a khaikhawmtu an ni tih hrereng turin a chah a, Mizoram leh mizo mipui te mil tur Cooperative society tun a kan neih te aia tha din zelna kawnga ngaihtuahna seng tam turin a chah bawk. Registrar Office, Cooperative department hotuten an lo thlen tawh angin Minister chuan department a thawktute indaihlohna nasat avanga harsatna awm leh thawktuten post ngai hun rei tak an chelh thin chu a hraitpui thu a sawi a, hmasawnna chak tak a kalpui tur chuan thawktute lungawi a pawimawh thu sawiin hemi zawn a hmalak a ngaih thu a sawi bawk a ni.

He hunah hian Pu Naveen Aggarwal, Registrar, Cooperative Societies chuan department hnuaia hnathawh leh hmachawp hrang hrangte power point presentation hmangin a tarlang a, Pu JP Agrawal, Secretary pawhin ‘Van Dhan Mission’ kalpui a nih theih nan hma chak tak a lak mek a nih thu a sawi bawk. Pu Lalmalsawma, ARCS pawhin he hunah hian Cooperative Society kaltlanga mipuiten kawng hrang hranga enzawnna leh hlawkna an dawn thu sawiin a sumfai anga tarlan remchang lo Society dawr Mizoram hmun hrang hranga awm te kaltlangin sum tam tak luangral tur ven kawnga hmanraw tangkai tak an nih thu a tarlang bawk a ni.

Vawiin presentation a tarlan danin State Level Cooperative Society 11 leh Primary Level 1169 an awm mek a, heng zingah hian Non-functional 228, Poor 181, Average 356, Good 373 leh Very Good 42 te an ni a, bawnghnute hnianghnar zawk a awm theih nan MULCO kaltlangin project lian tak kalpui tur a hmalak mek a nih thu tarlan a ni bawk.