Vawiin khan Power & Electricity enkawltu Minister Pu R. Lalzirliana’n P&E Department hnathawkte pawl – P&E Engineering Officers’ Association Annual General Conference, CIRA Garden, ITI Veng a buatsaih chu khuallian niin a  hmanpui.

Power & Electricity Minister Pu R Lalzirliana chuan P&E Department hnathawh chu a langsar a, kan thawh that leh that loh hi a lang nghal mai thin a, hengah te hian Department hnathawh selna leh fakna te chu anga khata ngaiin an hnathawh naah thahnemngai leh zual turin engineer kalkhawmte chu a chah a. Department a thawk te inpekna chu amah ngei pawhin a hriatpui thu sawiin mipuiin lamin hriatpui lo mahse, line chhia te siam tura khawtlang hruaitute ngenna te ngaipawimawha hun pawh sawilova in, in volunteer te hi a hlui a, a fakawm a ni, a ti.

Insiksawi transfer leh posting chungchang sawiin Pu R. Lalzirliana chuan Mizoram hi kan ta a ni a, khawi hmunah pawh awm theihna rilru put thiam a pawimawh a, chutih rualin hmun khata, rei tak awm erawh hi thil tha ber a ni lova, hmun tha leh nuam te leh hmun hla leh harsaa a ngaihte hi angkhata hrut a, Transfer and Posting Rules anga kal mai hi thil tha ber a ni, a ti a.  Insiksawi chungchanga mi thil ti thei rawih te, hotute biak that leh tlawm te leh post thaa awm duh vanga  thu kherh te hi thil zahthlak a ni a, mithiam tih atan a mawi lo a ni, a ti.

Minister chuan an hnathawh naah taimakna te, rinawmna te, dikna te nunpui tura chahin mipuiin an dawrna kawngah mipui aw chu dawthei turin leh hawihawmna nen thinglung dam thei ang berah an mahni dawrtu te dawngsawng thiam turin P&E hnathawk te chu a fuih bawk a. P&E Department journal Kawlpetha issue thar ber a tlangzarh nghal a ni.

General Conference hi an pawl President Er. Vanlal Tlana kaihruaiin Member thar mi 10 an lawm bakah an Member mi 7 pension a chhuak ta thlahna hun an hmang a. Chawhnu session ah thurel tura an chhawpchhuah te an sawihona a ni.

PEOA hi kum 2000 khan ding tannin Member 134 an awm mek a ni.