Vawiin khan Deputy Chief Minister, UD&PA Minister ni bawk Pu Tawnluia’n cheng nuai 2268.43 seng a sak Kolasib Sports Complex, Project Veng, Kolasib ami chu a hawng a, bialtu MLA leh Minister ni bawk Pu K. Lalrinliana, Sports & Youth Services Minister Pu Robert Romawia Royte, Veterinary & Fishery Board Vice-Chairman Pu C.Lalmuanpuia, MLA, Rubber & Allied Crops Development Board Vice-Chairman Pu Lalrinsanga Ralte, MLA, Pu Zodintluanga Ralte, MLA bakah Sports & Youth Services leh UD&PA hotu lian ten he hun hi an hmanpui a ni.

Sports Complex hawnna inkhawm buatsaih ah Deputy Chief Minister Pu Tawnluia chuan thusawiin, Kolasib Sports Complex sa tura project bul tantu UD&PA Minister hlui Pu Zodintluanga Ralte in Kolasib Sports Complex hawnna inkhawm a telpui thei chu lawmawm a tih thu a sawi a, a hmawrbawktu a a tang thei chuvannei a intih thu a sawi a ni. Deputy Chief Minister chuan UD&PA in an tih tura ruat chin tha taka an zo thei chu lawmawm a ti a, sum tam tak sengin a sak hna an thawk a, a enkawlzui lam pawh a mawhphurtu tur ten uluk taka an tih a beisei thu a sawi a, a enkawl zuitu tur department pawh fimkhur taka inrawn tlang chunga ruat a nih dawn thu a sawi a ni. Ram changkang leh ram hmasawn tehfung pawimawh tak chu infiamna khawvela an dinhmun hi a ni fo thin tih sawiin keini pawhin theihtawp chhuahin rual elna rilru dik nen tan ka tur a ni ang a ti a. Sports Policy siamin bulk an tan dawn a, hei hian nasa takin hma min sawn tir dawn a ni a ti a. UD&PA department pawhin infiamna ruhrel (sports infrastructure) siam kawngah thalaite hmakhua ngaiin hma a la chhunzawm zel dawn a ni a ti a, infiammite hnenah ngenna siamin, an hmasawnna tur leh an hlawhtlin theihna turin sawrkarin ruahmanna hrang hrang a siam sak a, a la siam sak leh zel dawn bawk a, heng an puala hmanrua leh thil chi hrang hrang duhsak taka an buatsaihsak te hi dimdawi tak leh finkhur taka enkawl a, a nihna ang taka hmang tangkai tura an rilru, ngaihtuahna leh thahrui seng tura chahin hreipui khuai tu thei pawh tha sen a ngai zel angin tumruhna, taimakna leh Pathian tihna nen theihtawp chhuah turin a chah a ni.

Sports & Youth Services Minister Pu Robert Romawia Royte pawhin Kolasib mipuite lawmpuina thu hlanin India sawrkarin sports a ngaipawimawh thar em em a, national Education Policy tharah phei chuan sports hi curriculum pakhat angin a telh dawn a, school tinah subject khat angin a awm tawh dawn a, Mizoram sawrkar pawhin nasa takin tan lak a tum a ni a ti a. Mizoramah March thla a Fit Mizoram Movement kan tan hnu ah India sawrkarin August thla khan Fit India movement a rawn tan veleh a, hei hian fit taka awm kan mamawh zia a tarlang a, hmasawnna atan taksa in fit leh hrisel kan mamawh a ni tiin taksa enkawl that kawngah tan la turin Mizoram mipuite a sawm a, Tunah hian Mizoram a football ground hrang hrang 13 chu phullem (artificial turf) phah tura ruahmanna siam fel a ni tawh a, a dang pawh tih belh zel turin hmalak mek a ni a ti a. Mizoram State Games inbuatsaihna pawh tluang taka kalpui zel a nih thu sawiin infiammite leh infiamna lama tui zawng zawngte a hlawhtlin nan theihtawp chhuah turin a sawm a ni.

Pu K. Lalrinliana, bialtu MLA leh Minister of State ni bawk pawhin khawtual pa a nih angin Sports Complex bul tan tirh atanga tun thlenga hmalak a nih dan hrechiang bertu zing ami an nih thu a sawi a. Field laih tan a nih atanga sports complex sak zawh a nih theihnan a harsatna hrang hrang su kiang tura UD&PA department official te leh infiamna lama tui mite inpekna leh thahnemngaihna zar kan zo a ni tiin lawmthu a sawi a. sports discipline hrang hrang khelh theihna hmun tha an nei chu lawmawm a tih thu sawiin, khawvel pum huap Olympic games thlenga zofate hmel tilangtu leh timawitu infiammi tha tak tak chher chhuahna hmun a nih ngei theih nan duhsakna a hlan a ni.

Sports Complex at Kolasib project hi National Building Construction Corporation Ltd (NBCC) aiawhte leh UD&PA department Engineer ten a hmunah kal a an enfiah hnu ah Detailed Project Report (DPR) an siam a, Sawrkar Laipui a Ministry of Urban Development-ah thehluh niin October ni 8, 2014 khan project hi pawm niin a sakna tur pawisa Rs. Nuai 2268.43/- pawh sanction nghal a ni a, he project hi “10% Lump sum provision for the benefit of North Eastern Region Including Sikkim Scheme” hnuai atanga hmuh a ni. Sports Complex sak hna hi NBCC Ltd. ten Central Government norms angin tender an chhuah hnu ah M/s Balajee Developers, Ghaziabad, UP chu thlan an ni a, anni hian February ni 15, 2015 ah hna tannin September ni 30, 2019 khan an sa zo a ni.

Sports Complex, Kolasib ah hian hengte hi dah a ni – Artificial Turf Football Ground (100mx65m), 8-Lane Synthetic running track, Boxing Room, Gym Room, Office, mipui 700 thut theihna Gallery, mi 120 thut theihna VIP Gallery (Gallery chihnih ah hian chair dah vek a ni), Infiammite inthlakna leh chawlh hahdamna tur room 8, ticket counter leh guard room main gate sir ve ve ah dah a ni bawk. Car parking siam a ni a, mipa leh hmeichhe toilet a hran ve ve dah a ni a, DG set (125Kva leh LT panel) main gate bulah dah a ni a, field sir kual chhuak hian MS fencing dah a ni a, track area ah SS railing dah a ni bawk.