Vawiin chawhma khan Deputy Chief Minister Pu Tawnluia’n Regional Sports Training Centre, Kolasib Saidan-ah Sports Authority of India (SAI) Centre lungphum a phum a, bialtu MLA leh Minister ni bawk Pu K. Lalrinliana, Sports & Youth Services Minister Pu Robert Romawia Royte, Veterinary & Fishery Board Vice-Chairman Pu C.Lalmuanpuia, MLA leh Rubber & Allied Crops Development Board Vice-Chairman Pu Lalrinsanga Ralte, MLA bakah Sparts & Youth Services leh UD&PA hotulian tenhe hun hi an hmanpui a ni.

Kolasib Saidan-a SAI Centre hi Mizoram Sawrkar leh Sports Authority of India tangkawp hmalakna a ni a. Ministry of Youth Affairs & Sports in Khelo India Scheme a siam hnuaia “Utilisation and Creation / Up-gradation of Sports Infrastructure” component kaltlanga hmalak niin Rs vaibelchhe 5 senga football petna tur phullem (artificial turf) phah phalna pek a ni a. June ni 1, 2019 khan hnathawh tan niin underground drainage siam zawh tawh a ni a, phullem phah tur pawh Kolkata atanga rawn thang mekin ruahman dan chuan January ni 31, 2020 hma a phah zawh vek tum a ni. He Centre hi India rama Sports Authority of India in football academy pahnih a neih zing ami a ni a, he hmuna zirlai awmte enkawlna senso zawng zawng sawrkar laipuiin a tum dawn bakah coach thiam bik sawrkar laipuiin a rawih ten an enkawl bawk ang.

Lungphum phumtu Deputy Chief Minister Pu Tawnluia chuan he hun puala inkhawm buatsaihah thu sawiin, SAI hmalakna a din Contact Sports Centre, Mission Vengthlang, Aizawl ami chu kan chhawr tangkai em em a, a belhchhahna tur SAI Centre kan neih belh leh tur hi a lawmawmin infiammite tan malsawmna thlentu a ni dawn a ni a ti a. SAI Centre tihhmasawn leh tihchangtlun kawngah sawrkarin theihtawp a chhuah zel dawn tih sawiin infiamna lama zofate rahbi thara min perh kaitu tur, khawvel ngamtu thalai infiammite chherchhuahna hmun tur a nih ngei a beisei thu a sawi a, sports lama tui mite an tuina leh an thiamna haichhuah a chher hriamna hmun ni turin leh chhungkua leh Mizoram bakah India ram tihmingthatu lo chhuahna hmun ni se a duh thu a sawi a. SAI Centre chu Mizoram ta a nih rualin Kolasib mipuite chu a neitu chan chang thiam tur leh SAI Centre a training tura lo kal infiammite lo dawngsawng thiam thin turin a chah bawk a ni.

Sports & Youth Services Minister Pu Robert Romawia Royte pawhin thusawiin, SAI kutchhuak mizo infiammi hlawhtling engemawzat kan nei tawh a, tunah Centre thar kan neih belh leh dawn a, hei hian infiammite hmasawnna nasa taka a thlen belh ngei ka beisei a ni a ti a. SAI Centre a hostel chu naupang 100 awmna tura ruahman ni mahse naupang 150 tal awmtir theihna tura tihlen tumin ngenna siam mek a ni a ti a, Football bakah sports discipline dang pahnih tal dah belh leh tura hmalak mek a ni a, eng discipline nge dah belh tur tih erawh uluk taka la ngaihtuah a nih dawn thu a sawi. Regional Sports Centre, Saidan a Mizoram sawrkarin football academy a kalpui mek chu a hlawhtling thawkhat hle a ni a ti a, Asia khawmualpuia Youth Football Tournament lian ber Subroto Cup Football Tournament champion vawi riat (under 14 boys – 5, under 17 boys -3) an ni tawh a, phullem phah a nih huna phullem hnuaia ttraining an neih hunah chuan tun aia nasa zawkin hlawhtlinna kan hmu ngei ang a ti bawk. Minister hian bialtu MLA, Minister of State ni bawk Pu K.Lalrinliana thahnemngaihna avang liau liau a SAI Centre hi sualchhuah a ni tiin lawmthu a hrilh nghal bawk a ni.