Co-ordination Committee on Management for Aizawl City, CoMACi chu an chairman Pu Vanlalngaihsaka, Aizawl District Bawrhsap hovin vawiin khan a pisa ah an thukhawm a, SIPMIU in Aizawl khawpui chhung hmun thenkhata tui lakna tur pipe line an phum dan tur leh thil pawimawh hrang hrang an sawiho.

CoMaCi Chairman chuan an hnathawh tlangpui tarlangin Aizawl Municipal Area huamchhung a hna chi hrang hrang thawktu sawrkar department leh private company etc. ten hna an thawh tur, a bik takin kawngpui khawih tel leh mipui tana harsatna thlen thei thil a nihin hna an thawh tan hma in, sawrkar thuchhuak angin CoMaCi hnenah an hriattir ngei ngei tur a ni a ti a. Works Department ten mipui leh ram hmasawn nana an hnathawh hrang hrangte insubuai lova mipui tana harsatna siam lo thei ang bera kawng siam leh kawng laih te, pipe phum, kawng block etc. leh thil dangte inrawn tlang  chunga thawhho dan tur ngaihtuah tur a din a ni a ti.

SIPMIU Programme Director Pu Lalrothanga chuan SIPMIU in Aizawl khawpui chawm tur tuilakna an buaipui mek chungchangah CoMaCi hnena an thu thlen a sawifiah a, an hmalak mek na “Augmentation of Aizawl Water Supply and Construction of 37-MLD Water Treatment Plant, Phase-3”  chu nitin tui litre maktaduai 37 pump thei tur a nih thu sawiin, Tanhril, Mualkhang ram a Setlak Lui chhuah atanga Laipuitlang Tuizem Lian thleng turin pipe phum mek a nih thu leh tun dinhmunah kilometre 11.5 an zawh tawh thu leh kilometre 2.6 an la hmabak thu a sawi a, heng an la hmabak Airport Junction – Ramrikawn (1210 metres), Zohnuai Junction – Hunthar Junction (810 metres), Damdiai Meat Shop – Axis Bank, Chanmari (138 metres), Axis Bank, Chanmari – Chaltlang Road (310 metres) leh Chaltlang Road to Laipuitlang kham pang (140 metres) te hi pipe phum zawh thuai a nih theih nan CoMaCi in hma lak pui turin a ngen a. CoMaCi chuan SIPMIU hmalakna chu mipuite tana tha tur a nih avangin fimkhur taka mipuite harsatna siam lo thei ang ber tura thawh dan an ngaihtuah a, contractor te hnathawh vil uluk lehzual tur leh an pipe phumna turin a nghawng theih PHE tui connection pipe, telephone line, kawngpui laihchhiat etc. ngai te chu a concerned department leh agency te nen uluk taka enho thin turin an hrilh a ni.

Co-ordination Committee on Management for Aizawl City hi Mizoram sawrkarin September ni 6, 2019 khan notification chhuahin a din a, Aizawl Municipal area huamchhunga sawrkar emaw sawrkar nilo eng agency pawhin hmasawnna hna an thawh tur chungchangah thuneihna sang tak pek a ni a, hna thawh tan hun tur, hna thawh lai tihtawp leh chhunzawm tir chungchangah thuneihna sang tak pek niin Aizawl Municipal Area huamchhunga hmasawnna hna thawktu reng rengin hna an thawh tan hma in CoMaCi remtihna an la ngei ngei tur a ni bawk a ni.

Co-ordination Committee on Management for Aizawl City Chairman hi aizawl district bawrsap niin Addl. DC, Aizawl chu Co-Chairman a ni a, member te chu Commissioner, AMC, Director, UD&PA,  Director, DM&R, Director, I&PR,  Director, Geology & Mineral Resources, Programme Director, SIPMIU, SP (Traffic), Aizawl, SP (DEF), Aizawl, SE, PWD (Aizawl Circle), SE, P&E (APC), SE, PHE (AWC) leh General Manager, BSNL te an ni.