3005/2022-2023

Aizawl 9th December 2022: Vawiin khan Home Minister Pu Lalchamliana kaihhruaiin SAD conference hall, MINECO-ah Coordination Committee on Traffic Management an thukhawm.

Meeting-ah hian kum 2019-a Coordination Committee on Traffic Management meeting rawtna leh thutlukna thlirho a ni a, kumin Aizawl khawchhunga Krismas leh kumthar vuakvetah traffic tawt lutuk tur venna leh hmalak dan tur ngaituah ho a ni a.

Kum danga tih thin dan angin kumin 2022 Krismas leh Kumthar vuakveta ‘No Vehicle Zone’ siam leh rawtna chu ngun taka ngaituah a ni a, meeting chuan ‘No Vehicle Zone’ siam leh ngei tha a ti a, a hun atan December 23, 24 leh 31, 2022 nise tiin a rel. Sr. Superintendent of Police, Aizawl Traffic in a tul angin Notification lo siam se tih a ni.

Two-wheeler taxi intlanchhawk chungchang pawh ngun taka ngaihtuah niin Aizawl khaw chhungah two-wheeler taxi 3294 zet a awm tawh thu tarlan niin, inrelbawlna fel zawk a awm theih nan leh traffic tawt lutuk tihziaawm nan two-wheeler taxi pawh group 3-ah thenin, nakkum January ni 1, 2023 atang chuan intlanchhawk tawh se tih rel a ni bawk a; State Transport Authority (STA) in commercial vehicle-te tlan man (rate) a bituk ang taka kalpui a nih theih nan nasa lehzualin STA in hma la se tih rel a ni bawk.

Aizawl khawpui chhunga Traffic Management/Urban Transport chungchangah thuneitu hlawm pakhat Unified Urban Transport/Traffic Management Authority awmin UD & PA Minister chairman-na hnuaiah awm se, a kaihhnawih hrang hrangte tel bawk se tih rel a ni a. Dan tan chhanin thuneihna leh tihtur mumal takin duan ni se, Aizawl khawpui chhunga traffic management kaihhnawih lian thamah chuan thutlukna leh ruahhmanna siam thin se tih a rel bawk a ni.

Coordination committee-ah hian memberte an kal tha hle a. Commissioner & Secretary, Home Pu H. Lalengmawia, Aizawl DC Dr. Lalhriatzuali Ralte, Aizawl SP, AMC leh department hrang hrangte an tel a ni.