3006/2022-2023

Kolasib dated 9th December 2022: Vawiin khan Pu TJ Lalnuntluanga, Minister of State, Transport Department chuan khuallian niin Vairengteah Motor vehicle Check gate thar hawnna hun a hmang a. Pu Lalrinsanga Ralte, MLA, Vice Chairman, Rubber & Allied Crops Development Board chu khual zahawm niin Pu KT Beicho, IRAS, Commissioner & Secretary chuan hun a kaihruai a ni.

Minister Pu TJ Lalnuntluanga chuan ram hmasawnna tur a Vairengte khawtlangin phal tak a hmunhma an ruahman avangin lawmthu a sawi a, ramri luhka pawimawh tak a lirthei endikna awm tur chuan Transport Department kaltlanga dan anga chhiah khawn hna a tih chak zual ngei a beisei thu a sawi. Transport minister chuan Transport department a thawktute inpekna avangin chhiah hrang hrang lakkhawm hna pawhin hmasawnna hmel thar a hmuh zel thu a tarlang a, Sawrkarin hmasawnna hna a thawhna tur a chhiah lakhawm tha ber zingah Transport Department a tel thu a sawi. He hun ah hian Transport Minister chuan tui hmang a kalpawhna awlsam siam turin project hrang hrang buaipui mek a nih thu a sawi a, kan luidungte chu hun rei lote chhungin tangkai tak a kan hman thuai a beiseiawm thu a sawi bawk a ni.

He hunah hian Khual zahawm Pu Lalrinsanga Ralte, MLA chuan Vairengte chu ramri a awm, Mizoram luhka leh chhuahka pawimawh tak a nih avangin kan Chief Minister zahawm tak leh kan Transport Minister te hmalaknaa MV Check Gate Building thar hawn theih a ni ta chu lawmawm a tih thu a sawi a.Hun harsa leh hunkhirh tak kan ramin a tawk chung pawha sawkarin ramri hmasawnna ngaihtuah a, kan bial chhunga hmasawnna leh hamthatna tam tak min thawhsak a, ramri hmangaiha, ngaihsaktu sawrkar kan nei hi a lawmawm takzet a ni, a ti bawk.

Vawiin MV Check gate, Vairengtea hawnna hun ah hian Er. R.Lalrammawia, Director chuan report pein Pu Zothanzuala, Joint Director in lawmthu sawina hun a hmang a ni.