3004/2022-2023

Mamit 9th December, 2022 : Mizoram khawpui fai inelna kal mekah vawiin khan Mizoram Cleanliness Competition, 2022 Panel of Judges pathum, Pu Andrew H. Lalremruata, Dy. Director, I&PR Department, Pi C. Malsawmzuali, Scientist B, MPCB leh Pu C. Lalhmachhuana, Treasurer, MJA te'n Mamit khawpui chhung an endik.

Pu Lalnunhlua, District Sanitation Chairman hovin DC Office Chamber-ah Mamit khawpui chhung faina kawnga hmalak dan hrang hrangte sawiho-a inkawmhona neih a ni a. Endiktute hian DUDO Office-ah faina lama an hmalakna leh bawlhhlawh sawngbawlna kawnga an hmalakna hrang hrang chungchangah questionaire hmangin DUDO Office-a thawkte kawmna an nei bawk.

Endiktute hi Pu Paul Rokima, DIPRO Mamit leh Pu C. Sawihlira, DUDO te'n Mamit khaw daiah lo hmuakin Mamit khawpui chhung hmun hrang hrang, kawngpui dung bakah vantlang inthiarna, Bazar hmun leh bawlhhlawh sawngbawlna hmun (Solid Waste Management) te chipchiar takin an fangkual a. Vantlang hmunhma, Waste to Art hmanga cheibawl dante an endik bawk.

Endiktute hian veng thenkhat VC te faina kawnga an hmalak dan chungchangah kawmna an nei bawk a ni.

Mamit khawpui endiktu Mizoram Cleanliness Competition, 2022 Panel of Judges te hian Mamit khawpui an endik zawh hian Mamit chhuahsanin Kolasib an pan a. Naktuk hian Kolasib khawpui an endik veleh ang.