No.755/2020-2021

Chief Minister Pu Zoramthanga hova vawiina Council of Ministers thukhawm chuan COVID-19 avanga lockdown kalpui mek chu India sorkarin a lo tih angin Mizoram tan kar hnih dang, May ni 17 thleng la chhunzawm ve ni se tiin a rel.

Lockdown kalpui chhunzawm a nih chhunga inkaihhruaina tur te he meeting ah hian an sawiho a. Council of Ministers thukhawm chuan hripui leng kara mipui him tlanna tura sorkar thuchhuakte tha zawka zawm a nih nan Health & Family Welfare Minister in Ordinance for Containment and Prevention of COVID-19 tih a chhawp chu sawiho niin an pawm a. He Ordinance hnuaiah hian mipui himna tura khapna thupek bawhchhetute hrem theih dan te sawifiah a ni.

Vawiin Council of Ministers thukhawm chuan sorkar laipuiin mahni state ni lo a tangkhangte anmahni state a hruai haw nan Indian Railways phalna a pek angin, Mizoram mi leh sa state danga tangkhangte pawh an lo haw ve theih dan tur ngaihtuahsak an remti a ni.

Meeting-ah hian Manipur leh hmarchhak state dang atanga tunhnaia tangkhang lo haw te chu sawrkar atanga a hrana puihna phut miah lova an lo haw hlawm chu fakawm an tih thu an sawi bawk.

Council of Ministers meeting-ah hian Chief Minister Pu Zoramthanga, Deputy Chief Minister Pu Tawnluia leh minister dangte an kim vek a ni.