Zoram mipui duhtakte,
Thuchah min lo ngaihthlaksaktute leh min thlir sak tute, min tawngtaisak reng thintute in zavaia chungah lawmthu sawi pahin chibai ka buk leh a che u.
Kan hriat theuh angin kan beisei loh leh thleng lo se ka tih COVID-19 vanga nunna chan pali lai kan nei ta a. October ni 28 khan Pu Lalsangkhuma, Dawrpui Vengin min boralsan a, Tun thla ni 5 khan Pi Darhawni Durtlang Leitan a boral a, Kar kalta zirtawpni khan Pu C. Lalthanga, Aizawl Dinthar veng chuan min boralsan lehin, inrinni zan khan Dr. K. Lalnuntluanga, Durtlang chuan min boralsan leh a, tun mai chawhnu dar 2:40 khan Pu Rengchhuana, seling khua in min kalsan tih kan han hre leh bawk a. Hetiang dinhmun kan thleng hi Health Department changtu Minister ka nihna ang pawhin pawi ka ti takzet a, lusunte thinlung takin ka tawrhpuia, keimah mai bakah Zoram mipuiten kan tawrhpuiin kan thinlung a rum a ni, tih ka sawi duh a. Lusun chhungte zawng zawng Pathianin thlamuan se tih hi ka tawngtaina a ni. Hetih rual hian damdawi in lama theihtawp chhuaha anmahni enkawltute chungah lawmthu ka sawi a, in rilru pawh a na in, in hnual hle a ni tih pawh ka hria, Pathian remruat kan dang thei lova, theihtawp tak meuh in chhuah tih kan hria a, beidawng lovin theihtawp chhuah zel ula, kan thlamuanpui che u a ni tih hre reng turin ka chah che u a ni.
Aizawl khawpui huam chhungah COVID-19 positive kan han pun tam deuh avang khan kar hnih chhung kan han in lockdown a nih kha, lockdown chhung khan thawktuten theihtawp chhuahin contact tracing an han ti a, sample la tute chhun zan zawmin an feh chhuak a, sample pawh kan test hnem hle a ni. Mipuiten thu kan awihna zarah leh thawktute thahnemngaihna zarah lockdown kan puan chhan kan tihhlawhtling thawkhat niin ka hria a, Aizawl khawpui huam chhunga positive tunhnai ni hnih thum chhunga kan hmuhchhuah zingah tualchhung a positive te hi an hri kaina pawh an chhungte, an chenpuite an ni ta deuh zel a. Positive tam zawk hi chu kan sipaite, duty neia Mizoram pawn kal, rawn haw te an ni a, Hostel a khunghran mek, an chanchin kan ngaihchante an ni bawk a, symptom nei pawh an tlem ta rih viau a ni. Hri kai enkawl mekte an dam thuai ka duhsakin kan tawngtaina ah pawh kan hre reng thin dawn nia.
Amaherawhchu, hei vang hian kan inthlahdah a thiang lo a ni tih i inhre nawn ang u.
Tun dinhmunah Mizorama COVID-19 hrik kai kan neih tawh hi mi 3,396 lai ni tawhin tuna hrik la pai mek, Active case kan tih hi, mi 516 kan awm a ni. Sawi taw hang khan thi hi mi panga (5) ngawt mai kan nei ta a; pung tawh lo ila tih hi kan tawngtaina a ni.
COVID-19A NORTH-EAST STATE TE DINHMUN LO THLIR ILA: -
COVID-19 vanga thi zat hi mi sanghnih a tling tep ta ( mi 1,834)
Assam : 210268 (Thi : 964)
Tripura : 31942 (Thi : 359)
Manipur : 21871 (Thi : 221)
Nagaland : 9885 (Thi : 52)
Arunachal : 15812 (Thi : 48)
Meghalaya : 10668 (Thi :100)
Sikim : 4499 (Thi: 86)
Mizoram : 3396 (Thi : 5)
INDIA ramah COVID-19 kai tawh zat hi mi 88,46,119 niin thi tawh hi mi 1,30,112 lai a tling ta.
KHAWVEL pumpuia thi tawh zat hi Nuaih 13 chuang ni tawhin COVID-19 kai zat hi Maktaduaih 55 a tling tep ta !
SAMPLES TESTED MIZORAM
NO OF TEST RT-PCR (ZMC) : 74,785
RAPID ANTIGEN MIZORAM : 47,785
TRUENAT PCR MIZORAM : 8,602
Sample test zawng zawng hi1,31,172niin 100 zela 2.60% chu COVID-19 Positive a ni.
Europe ram ropui leh changkang zawkah pawh COVID-19 hri hi kai thar an pung nasa in an lu a hai hle tih kan hre theuh awm e.
Anni ram ropui zawkte pawhin hri inkaidarh chak lutuk tur ven nan LOCKDOWN bak chu hma lak ngaihna an hre bik lo a ni chek ang - United Kingdom, Kumpinu kan tih, pawhin November ni 5 atang khan thla khat chhung atan lockdown an puang a; anni bakah France, Greece, Ireland, Denmark, Austria leh ram dang engemaw zatin lockdown hi an kalpui mek bawk a ni.
Hemi ka han sawi chhan chu kan hmalam hun hi a hriat loh a, hri kai kan pung leh thut a nih chuan loh theih loh a lockdown puan leh mai te hi a tul thei a, hetiang harsatna kan tawk leh a nih pawhin mipuiten sawrkar hmalakna minhriatthiampui zel tur leh thuawih taka lo thlawp zel turin ka han ngen che u a ni. A leh lamah chuan LOCKDOWN neih ngai lo tura mitin kan fimkhur tlan pawh a pawimawh hle mai.
Tun thla chhung atan Mizoramah COVID-19 No Tolerance kan hmang mek a ni a, hei hi mipuiten phurrit ah ngai lo ila, COVID-19 laka kan inven theihna tur atana sawrkar thupek hrang hrang kan neihsa te kha khauh taka kenkawh tihna a ni mai a, dan awm sa kan zawm tlan a kan himpui theih tur nia kan ngaihte kha a ni tih hria in thuawih takin mahni theuh khan uluk takin i zawm zel ang u.
No Tolerance kan hman lai mekah dan bawhchhia man zinga a tam ber chu mask vuah lo leh social distancing zawm lo an ni a, vantlang hmuna chilchhak man an awm nual bawk a ni.
Hengte hi COVID-19 hri kan kai lohna tur atana pawimawh em em te kha an ni a, a bik takin mask vuah phei hi chu ngaihpawimawh a tul hle a; COVID-19 bakah virus dang tam tak lakah min veng a, kan doctor te pawhin kum dang aiin tlang hrileng leh naupang damlo an tlem thu an sawi a ni.
COVID-19 hri danna (Vaccine) hmuhchhuah tumin ram hrang hrangin theihtawp an chhuah a, thu lawmawm pawh kan nei thuai turah beisei ila, mahse vaccine hmuhchhuah a nih hma chu kan hmun theuhah i tang hram hram zel ang u. Kan theih ang tawk tawka kan lo inven rih hi a pawimawh ber a ni tih ka han sawi nawn fo duh a ni.
Kan hriat theuh angin Kristiante hunpui Krismas leh kumthar kan thleng chho dawn a, thlasik khaw vawt a in tan dawn bawk nen, nidang aia kan fimkhur lehzual a tul hle mai a, kan hun hman dan pawh kan her rem a ngai dawn niin a hriat a, chhungkhat lainate kan intlawhpawh dawn a nih pawhin fimkhur hle ila, kohhran thenkhat chuan Krismas leh kumthar ruai theh lo turin thutlukna an siam tawh a; hei hi thil lawmawm leh hriat nuam tak a ni. Kan himna tur atana tha ber ngaihtuah a hma la zel turin kohhran leh khawtlang hruaitute ka chah duh che u a ni.
Ka sawi fo tawh thin a, COVID-19 hri hi khawvelin a la hriat ngai loh thil thar a nih avangin kum khat dawn hnu ah pawh a invenna damdawi pawh hmuhchhuah theih a la ni lova, hri dona kawnga hma kan lakna ah pawh ngaihtuah kim sen a har takzet a, a tha ni a kan hriat te kha reilote ah a lo fuh chiah lo tih kan hre leh thin a, keini chauh pawh kan ni lo, khawvel hmun hrang hrangah hetiang harsatna hi an tawk vek a ni.
Tunah pawh Covid-19 hri kai / damlote enkawlna atanga chhuahtir (discharge) leh enkawlna tihtawp chungchanga inkaihruaina leh quarantine chungchang inkaihhruaina pawh tun thla tir khan kan han siam tha leh a, kan hun tawng mil zelin kaihhruaina hrang hrangte pawh siam that leh a thar siam a la tul zel dawn a ni.
Kan zavaia kan him tlanna tur ber ngaihtuah chung zelin hma kan la thin tih min hriatsak nawn fo ula, tihsual palh leh tih fuh loh kan neih thinah pawh in sel mai lovin, a tha tur zawk kan hria a nih phei chuan thurawn la turin kan inhawng reng a ni tih min hriatsak dawn nia.
Hri leng laka invenna atana tha ber khawvel pumpuiin an pawm tlan chu a tir atang khan a la danglam lova - mask vuah, midang hnaih lutuk lova awm leh kut silfai that bakah chil leh khak chhak loh te kha i zawm tha ang u.Hei bakah hian mahni uluk takin in chik reng ila, ngaihthat lohna kan nei a nih chuan helpline kaltlangin emaw, Local Task Force kaltlangin emaw in report vat thin nise.
Tunlaiah internet kaltlangin awlsam takin thu thar kan hria in kan zawng chhuak zung zung thei tawh a, hetah hian mitin fimkhur ila, internet leh social media a kan hmuh leh hriatte hi a dik vek lo fo a ni tih hria ila, hei bakah hian ram hrang hrang dinhmun a in ang lova, a theih hram chuan sawrkar thu leh hla ngaichang ila, thu dik leh belhchian dawl chauh i pu darh ang u.
Ka sawi fo tawh thin a, ka ngaih pawimawh em avangin ka sawi nawn leh duh a ni. Thalaite naupang zawk leh hrisel tha zawkte fimkhur reng ang u, ei leh bar bakah nitina kan eizawnna kawng kan zawh kawngah mawhphurhna kan nei lian em em a ni tih hre thar leh ila, kan inchhungkhurah nu leh pa, pi leh pu bakah naupang, natna benvawn nei leh hriselna lama pan takte an awm a nih phei chuan pawn chhuak velo mahse, a vakchhuakte atangin he natna an kai palh a nih hlauh chuan a buaithlak dawn a, mahni theuh hi kan pawimawh a ni tih hria in fimkhur zel ang u.
Kum upa zawkte pawh thil tul tawpkhawk ah lo chuan pawn chhuak lo ila, thenawm khawveng inlenpawh pawh hi a tul tawpah lo chuan i insum chhunzawm rih hram hram ang u.
He hripui dona kawnga kan thawhhona that vangin India ram hmun dang aiin tun thlengin kan ziaawm niin a lang a, hemi kawnga theihtawp chhuahtu zawng zawngte chungah lawmthu ka sawi a, nizana TV live programme kaltlanga zoram pum tawngtai rual hun buatsaihtu Mizoram Kohhran Hruaitute Committee chungah pawh thinlung takin lawmthu ka sawi a ni.
A tawp berah chuan a eng lam thlir chung zelin, nasa lehzualin Pathian hnenah tawngtai ila, sawrkarin theihtawp a chhuah mek rualin mipuite pawhin tih ve tur kan nei a ni tih kha i hre thar leh fo thin ang u.
Ka lawm e
