Kan khual zahawm, Pu Robert Romawia Royte, Hon’ble Minister of State (IC), Tourism, Pi Esther Lal Ruatkimi, Commissioner & Secretary, Tourism Department, Tourism Department Officials zawng zawng te leh kan virtual festival lo thlir tu zawng zawng te Anthurium Kut chibai vek ule.

Virtual Anthurium Festival 2020 lawmna a ka tel thei hi lawmawm ka ti hle a, boruak rit tak karah programme hlimawm tak Tourism Department in an buatsaih hi Zoram mipui ten mahni in lum theuh atanga hlim taka in lo thlir ve ngei ka beisei.

          Anthurium Festival hi kum 2006 atang khan Tourist Resort Reiek ah Reiek leh Ailawng mipui te nena  thawhhona in ropui taka lawm thin ani a, mipui leh khualzin mite hlut a hlawh thin hle ani. Kan culture zia rang mawi tak tak pholanna hmanraw tha tak anih mai bakah kan zaimi ten hlim takin mipui min lo awi tawh thin a, zin mite pawh nasa takin a lo hip tawh thin ani. Anthurium Festival hi India ram ngei ah pawh hriat a hlawh sawt em em a, hnamdang chhim chak an pung zel ani. 

Anthurium Festival to bul hi han sawi lang ve lawk ila. Ministry of Tourism, Government of India chuan phal takin kum tin festival hman nan hian Mizoram Sorkar ah sum a pe thin a. He sum hi thil dang atan hman theih ani lo a, Mizoram Tourism chawikan nan kut huaihawt ngei ngei turin min ti ani. Hemi hmang hian Tourism Department chuan theihtawp chhuah in kut pahnih a huaihawt thin a Anthurium Festival leh Winter Festival te hi an ni. 

Vanneih thlak takin kuminah hian state dang dawng an awm ve loh lai in keini chuan he festival hi kan hmang thei hlauh a. Kum dang angin Reiek ah hmang theilo mah ila Standard Operating Procedure sorkar in a chhuah zawm chung zelin mipui tan Virtual Festival hi huaihawt ani ta ani. Kan boruak mila Digital platform hmanga, mipui punkhawm ngailo in kan local channel hrang hrang LPS, Zonet leh DDK ah te leh social media Instagram, facebook leh youtube hmanga live stream a pek chhuah a ni ta ani. Mipui ten nuam takin mahni in lum atanga kan programme hi lo thlir in in hlimpui ngei ka beisei ani.

Anthurium par hi pangpar mawi tak mai ani a. A tir ah kan rama la awm ngailo ni mahse, Hortitulture Department ten zirchianna an neih ah he pangpar hi kan ram leilung nen a in mil ani tih an hmuchhuak a, nasa taka hma la in Holland ram atangin kum 2002 khan lak luh ani ta ani. Beisei ang ngeiin a par tha in a par duh ta em em a, eizawnna puitling  ah a lo chhuak ta ani. Tu pawh a tui mi tan leh taima taka ching tan chuan sum hnar tha tak ani a, chhungkua chawm thei khawpin hlawkna a tel theih ani. A bik takin nu ho tan mahni in chhuahsan ngailo in, hobby ni pah fawm in mahni inbul huan ah nisa pawh do ngai miah lovin hahdam deuhin a thar theuh theih a, a remchang hle ani. 

Tichuan a tui mi an lo pung zel a, Zo Anthurium Growers Society te din a lo ni ta hial a, inkaih hruaina tha tak hnuaiah hma lakna a tam hle a. India ram hmun hrang hrang ah te leh ram pawn ah te exhibition ah tel in lawm man lak sawi tur a tam hle ani. Kum 18 lai mai he pangpar hian kan ram a lo luah ve tawh a, Mizoram tluka thar tha hi an tam lo viau mai. A tir ah phei chuan Dubai leh Tokyo ah te export thin ani a, amaherawh chu transportation ah te harsatna a awm a, chu mai bakah kan supply hneh loh em avangin tih tawp a lo ngai ta a. Tun dinhmun ah chuan New Delhi ah kar tin kuang 7000 vel thawn ziah a lo ni ta a, demand hi kan la supply hneh lo hle ni in an sawi. Thawn loh tam tak la awm te hi local market ah hralh a hlawh hle bawk. Par pakhat hi a size a zirin cheng nga (Rs. 5) atanga cheng 20 (Rs. 20) a hralh thin ani. Hma kan sawn nasa hle a, a tir a variety tlem te a bul tan kha tunah chuan variety 35 vel lai kan nei ve ta a. Aizawl, Lunglei, Kolasib leh Serchhip ah te anthurium chin hi an uar leh zual ani. 

Horticulture Department hian theihtawp chhuahin bul an tan sak tawh angin tun thleng hian tanpuina leh hamthatna in anthurium ching tu te hi a la chhawmdawl zel a. An mamawh tur ang apiang subsidized rate in a supply char char bakah a thlawn te pawh in a sem nasa em em ani. Anthurium par hi kum hlun a par ani a, ruah tui tam lai hi a par tam lai a lo nih leh zel avangin engtik lai mah in a rem thei lo a, hei vang hian Mizoram thil thar khailak miah lo a ram pawn a kan thawn chhuah theih awmchhun ani hial ani. Kan lo sawi lan tawh ang khan Anthurium Festival hi a tir atangin Tourism Department leh Horticulture Department te tangkawpin, theihtawp a hlawhtlinnan hian tha leh sum an lo hmang tawh a, kan ram in a kan lar chhuah pui chu kut chi khat, khualzinte hip na remchang ah hman a lo ni ta ani.

Theihtawpa hma lak tumin kan rilruah chuan ruahmanna hrang hrang kan chhawp a, mahse thil tam kan tih hmain Covid 19 hripuiin khawvel a chawk buai ta si a, eng mah tih hleih theih a ni ta rih lo a ni. Eng pawh ni se la, Mizoram Tourism hian ke a pen theih nan theihtawp kan chhuah zel dawn a, thil ropui leh danglam tak tun mai ah kan sual chhuak thei lo a nih pawhin, thangtharten an rawn chhunzawm tur eng emaw tal hnutchhiah chu kan tum tlat a ni. Kan sawi tawh ang khan kan ram mawina te, kan hnam ze hrang hrang, kan culture leh tradition te hi khawvel mit hmuha pho chhuah tlak a ni a, kan hnam lam (cultural dance) te phei chu khawvelah a aia mawi a awm lo vang tih ngam a ni a, awmze nei leh mi hip thei zawnga kan kalpui chuan khualzin hipna tangkai takah kan hmang thei dawn a ni.

Tuna kan kut hman mek thupui hi hetia kan hmuh ang hian, Mizoram danglam bikna thuruk rawn chhim ve tura sawmna a ni a. Keimahni Mizote ngei pawh hian kan ram danglamna thuruk hi kan la hre lo a ni thei, kan thuruk hi keimahni ngei tan pawh thupin a la awm a ni thei bawk a. Chu tak chu Tourism hmang hian hai chhuah kan tum dawn a ni. Kan ram leilung te, kan tlang leh mual te kan enin mi ram mawi tak tak leh ropui tak takte a tluk lo a ni thei. Zep thu a awm lo va, kan thing leh mau a chereu hret hret a, kan ram leilung pawh a da hret hret tih kan hria. Chutiang a nih lai chuan khualzin kan hip theihna tur hai chhuah zel hi kan thupui ber ani a, unexplored destination kan la nih avangin hmabak kan la ngah em em ani.

A dawt lehah chuan: Khawvel ram danga thil ropui leh changkang tak tak awmna hmuna khawsa leh chengte hian hnam hrang hrang nun dan leh an nunphung hi hmuhnawm an ti a, chu chu khawvel ram hrang hranga khualzin hiptu ber pawh a ni reng a. Kan hnam zai leh lam te, kan infiamna chi hrang hrang te, hnam dana kan lo neih tawh kan ei leh in siam dan chi hrang hrang te nen lam hian khawvel ram dang mite tana en chakawm leh, tem ve chakawma kan siam a ngai a, chutiang rilru kan put thar theih a, kan zavaia kan tan tlan chuan hun rei lo teah khualzin kan hip theihna hi a pung ngeiin a rinawm a ni. Hmanrua kan neih ang apiang kan hman thiam hian, a hmuhnawmin mi a hip mai dawn a lo ni a, chutiang rilru pu tura mipuite fuih harh tur chuan theihtawp kan chhuah zel ang.

Han sawi belh leh ta i la, Japanese sushi te, China rama vamur bu man to em em an ei thin te, Mexico lama an ei tur thak em em te hi khawvelin a tem chak a. Eng vangin nge kan hmar bai thak em em te, ka sa-um bawl tui tak mai te, kan sawhbawl tui tak mai te hi an tem chak tura kan siam theih loh bik ang le? Thangthar lung fing zawkte rilru leh ngaihtuahna hi kan la chhawr chho dawn chauh va, Tourism lamah pawh kan harh chho zel ang tih hi ka beiseina a ni.

Tunlaia khawvelin a ngaih pawimawh em em Ecotourism lam hawi hian hma lak tur kan la ngah hle a. Tunlai tourism trend han en chuan camping te leh nature based tourism hi a lar em em a. Mizoram hi trekking nan a nuam em em a, Phawngpui tlang te leh Reiek tlang te hian tlawhtu pawh a ngah viau ani. Murlen lamah te leh Phawngpui ram ngaw ah te birdwatching tur hian India ram hmar lam te leh Mumbai lam atang ten mikhual kan nei deuh reng ani. Mamit District a kan Dampa Wildlife Sanctuary te hi khawvel hmuh a chhuan tham a tling a. Dampa ah hian marbled cat species leh clouded leopard population khawvel pum huapa an tam na ber ani hial. Hei mai bakah Vangchhia lama kan kawtchhuah ropui te hi khawvel a necropolis site lian ber a ngaih ani bawk. Kan leilung leh khuarel thil zawng zawng te, mihring leh nungcha te, leilung leh thing leh mau zawng zawng te hman thiam kan zir ang a, chutianga Pathian siam sa hmang chuan khualzin hip hi kan bei chho zel dawn ani. 

Mi ramah chuan Tourism hmang hian sum tam tak an la lut thin tih kan hria a, anmahni inbuatsaihna leh tum vang reng ni lova khualzin tam takin tlawh an tum tlat khawpa ram vannei tam tak an awm tih pawh kan hria. Keini erawh chu kan ram leilung kan enin khualzin hip theih na tur monuments te sawi tur kan nei ve lo a, tourism lama hma ka sawn dawn a nih chuan keimahni ngeiin kan chei bawl a, khualzin hip tura ruahmanna kan siam a ngai tih kan hre chiang a, chumi atan chuan mi tin hian mawh kan phur a, kan ram hi kan hmangaih a nih chuan mahni tih theih tawkah theuh kan ram hi kan duat a ngai a ni tih hi mipuite ka chah duh che u a ni.

A tawp bera ka sawi duh chu pandemic karah mipui te thu awih tak leh sorkar thuchhuak zaingai zel chunga New Normal kan pawm tlang thiam hi a pawimawh a. Kan him na tur ani tih hre reng ila, mask vuah te, kut sil ngun te hi i thlahdah lo ang u. A tul te lo ah chuan chhuah veivah te hi sim a hun tawh ani. Vawiin a kan festival hman te pawh hi a fimkhur thei ang berin kan kalpui ani tih hria in, mipui te rilru chhawk zangkhai nana intihhlimna kan buatsaih hi mitin tan malsawmna a nih ngei ka beisei a. Thlirtu zawng zawng te chungah lawmthu sawi pah in Virtual Anthurium Festival 2020 chu lawm takin ka hawng e.