No.3162/2019-2020

Vawiin khan CM Cabinet Meeting room-ah Chief Minister Pu Zoramthanga kaihhruaiin Council of Ministers chuan Covid-19 chungchanga sawrkar hmalakna hrang hrang te thlirhovin, hmalak belh ngaite an sawiho.

Meeting kaihruaitu Chief Minister Pu Zoramthanga chuan sawrkarin mipui him tlanna turin COVID-19 kaihhnawihah a tul ang zelin sum leh pai mamawh ruahman a ni tih a sawi.

Health Minister Dr R.Lalthangliana chuan testing kit nei tura buaipui chhung a rei thin avangin neih nghal mai theih ni lo mah se theihtawp chhuah mek a ni, a ti a. Khawsik enna (thermal scanner) pawh chah belh niin, market-ah lei tur a tlem tawh chungin tun dinhmuna indaihlohna phuhru thei tur khawp chu chah a nih thu a sawi a ni.

Mipui him tlanna tur atana sawrkarin zirna in a khar hnuah chawlh satliah emaw tia pawna chhuak vak tam tak an la awm tih hriat a ni a. Hei hi khawtlang hriselna atana thil pawi tak thlen thei a ni tih meeting-ah hian sawi a ni a. Chakkhai lam tur leh thil tul bikah lo chuan mahni ina awm tam tura inhrilhhriat nawn leh kan mamawh hle a ni, tiin meeting hian an sawi. Sawrkar hmun thenkhat, tlawhtu nei tam deuhte chu mipui him tlan zawk nan khar a ni tawh a, vawiin Council of Ministers thukhawm chuan Mizoram State Museum pawh khar tel ve ni se an ti a ni.

Meeting-ah hian border hrang hrang khar rih a nih dan te sawiin, heng border-a endikna kalpui a nih dan te sawiho a ni a. Bangladesh nena inrina pawh khar a nih tawh thu an sawi. Border-a screening titu ten hmanrua an mamawh te pek belh a tul thu sawiin, thermal scanner pek belh bakah felfai leh chak zawka data recording tih theih nan laptop ruahman sak te, a remchan dan anga a nghet lova thawktu (temporary employee) lak belh te an rel a, tlawmngai pawlte nena tan tlan a tul thu sawi a ni bawk. Sawrkar office hrang hrangah kutsilna siam a ni chu lawmawm tiin, thawktute pawh fimkhur tlang zel se an ti a ni.

'The Epidemic Diseases Act 1897' behchhana Mizoram Sawrkarin ‘The Mizoram Epidemic (COVID-19) Regulations, 2020’ a tihchhuah chuan ni 28 kalta chhunga COVID-19 awmna ram/hmun atanga lo lutte chu sawrkarin Screening point a siamah te in report a, mahni inchhunga khung hran (Home quarantine) emaw sawrkarin khunghranna hmun bik a siam (Designated Quarantine Facility)-ah emaw Isolation Facility ah emaw dah an nih tur thu leh, zawm duh lo an awm chuan tihluihna hmanga thuneituten an dah theih thu sawi a ni.

Tun dinhmunah Zokhawthar leh Lengpui Tourist Lodge chu Quarantine Station atan buatsaih a ni tawh a. State leh District level-ah Task Force din tawh a ni a. Local Council/Village Council kaihhruaina hnuaiah veng/khawtina NGO leh kohhrante telna Local/Village Level Task Force din tur a ni bawk.