No.3161/2019-2020

District Information & Public Relations Office leh District Hospital Champhaite tangkawp buatsaihin Novel Coronavirus Disease (Covid-19) chungchang Media mite zirtirna leh chak zawka mipui zirtir an nih theihna tura hmalakna pakhat atan vawiin chawhnu khan I& PR Conference Hall, CHANEM-ah inzirtirna hun buatsaih a ni.

He hun hi Dr. Lallawmkima, DIPRO Champhai chuan kaihruaiin tunlai khawvel pum buaipui mek natna darhchak tak Covid-19 laka invenlawkna chu theihtawpa kalpui anih mek thu leh mipuite chi ai mai lova sawrkar hmalakna leh thuchhuahte ngaichanga thlawp thin turin a ngen a. Chanchinbumite chu zau zawka mipuite hnena sawrkar thu leh hla mai bakah hmachhawpte dik taka thlentu an nih angin Covid-19 chungchang chiang lehzuala an hriat a tul takzet thu a sawi a. Inzirtirna hun buatsaih chu uluk taka ngaithlaa thu dik leh belhchian dawl puanchhuah leh mipuite zirtirna kawnga tanpuitu atana hmang turin a chah a ni.

He hunah hian Resource Person Dr. R. Lalrinmawia, MD, Anaesthesiology & Critical Care Medicine, District Hospital Champhai hnen atangin Novel Coronavirus Disease, Covid-19 ti a hriat lar chungchang chipchiar taka ngaihthlak a ni a. Coronavirus generic pali awmsa piah lamah a thar rawn awmin Covid-19 a thlen thu leh, March ni 11, 2020 ah khawvel pum tibuai natna Pandemic-ah puan anih thu a sawi a. Natna kai zinga 80% te chu hritlang satliah, 13.8 % te chu pneumonia, thawhah an nih bakah 4.5% te ngaihtuahawm an ni a, natna vei 3.5% ten an thihpui a ni, a ti a. Natna benvawn nei lawk leh kum lam upa te’n an tuarnat bik thu leh India ram chu Stage 2, Local transmission Stage-ah kan awm mek thu a sawi a. Kut silfai uar, hmai, mit, ka leh hnar khawih mai mai loh, chil leh khak chhak lohte, a veite’n hmaituamna face mask vuah, inkhung hrang leh thil nazawng khawih loh a tul thu a sawi bawk. Harsatna nei leh thu thlen duh neite tan engtik lai pawha biakpawhna tur Helpline No. 102 (Toll Free) leh 0389-2323336/2318336 a awm thu he hunah hian a tarlang tel bawk a. Ram dang leh State dang atanga lo hawte chu ni 14 chhung tal inkhung hrang tura tih an nih thu leh chhungkua emaw, hnathawhna hmunah Covid-19 vei an awm tih hmuhchhuah anih chuan a bula awmte pawh khung hran nghal zel tur a ni, a ti bawk. Media te chu sawrkar hmalakna leh mipuite hriat tur angte puan kawngah sawrkar tawiawma theihtawp chhuah zel turin a chah bawk a ni.

Pu Lalhmingmawia Pachuau, President, MJA Champhai District chuan Media-te tana Covid-19 zirtirna hun tha tak siam a ni chu an hlawkpui thu leh mipuite zirtirna kawngah theihtawp an chhuah chhunzawm zel tur thu sawiin he hun hi a khar a ni.