1229/2022-2023
Vawiin chawhnu khan Lunglei DC & Chairman District Disaster Management Authority (DDMA), Pu Kulothugan A kaihhruaiin Lunglei DC Conference Hall-ah Covid-19 do kawnga hmalak tul te sawihona meeting neih a ni. Tun dinhmunah Lunglei District-ah Covid-19 active case 202 a awm mek a ni.

Meeting-ah hian Lunglei SP Pu Rex Zarzoliana Vanchhawng, Addl DC Pu V. Lalruatliana, CMO Dr LC Liana, Medical Superintendent Dr SR Ngurchamliana leh official dangte bakah Joint VC Lunglei leh MHIP hruaitute an tel a ni.

Lunglei DC & Chairman DDMA, Pu Kulothugan A chuan tun dinhmunah Covid-19 case a pun chhoh leh mek thu sawiin Lunglei District-ah July thla chhungin case 237 hmuhchhuah anih tawh thu a sawi a. Covid-19 case pung zel tur chhut chah nan leh District mipuiten tun aia Covid Appropriate Behavior (CAB) an zawm that na tura hmalak tul hrang hrang te kalkhawmte a sawipui a ni.

Tun dinhmunah Lunglei District-ah Covid Care Centre (CCC) a awmloh thu H&FW Department hotute chuan an report a. Lunglei District-a CCC hawn leh thuai anih theihnan sawrkarah dilna thehluh vat ni se tih meeting chuan a rel a. Baptist Covid Care Centre (BCCC), Christian Hospital, Serkawn pawh hawn leh anih theihnan BCM hotute hnenah ngenna siam ni se tih meeting chuan a rel bawk. Mipui punhkawmna hmun, sports inelna, sakhaw biakin, school leh college-ah te CAB tha taka zawm anih theihnan ngenna siam nise tih meeting chuan a rel a ni.

State Executive Committee on Covid-19 thutkhawmna neih thuai tum anih thu report niin an thutkhawm hma ngeia Lunglei District mamawhte thlen tura hmalak nghal a ni bawk.

Tun dinhmunah Lunglei District-ah Covid-19 active case 202 awm mekin case tamna hmun thenkhat te chu HATIM, Puikpuiah case 50, Tlabung case 32, Serkawn case 26, Lunglawn case 19, Buarpui case 15 te an ni.

Lunglei District-ah test 163,673 neih tawh niin positive case 21,111 a awm tawh a ni. Covid-19 avangin Lunglei District-ah nunna chan mi 49 (Male 35, female 14) an awm tawh bawk a ni.

Vaccine pek chhuah pawh kalpui mek zel niin 1st dose 99.6%, 2nd dose 87.8% pek chhuah tawh a ni.