1228/2022-2023
Aizawl, the 12th July 2022: Vawiin chawhnu khan National Bank for Agriculture and Rural Development (NABARD), Mizoram Regional Office chuan NABARD din cham vawi 41-na lawmna hun Auditorium, Mizoram Rural Bank, MINECO-ah a buatsaih a. He hun hi Governor Hari Babu Kambhampati chuan khuallian niin a hmanpui a. Dr.R.Lalthangliana, Health Minister chuan khualzahawm niin he hun hi a hmanpui bawk a ni.

Governor Hari Babu Kambhampati chuan NABARD in kum 40 hmel a hmu thei leh hemi chhunga India ram hmun hrang hranga thingtlangmite tih hmasawn hna hlawhtling taka a thawk chu a lawmpui tak zet tih a sawi a. NABARD in Mizoram Sawrkar hmalakna atan nasa takin sum tam thak hmangin hna a thawk mek zel a. Tunah hian Rs.1900 crore lai Mizoram chhunga thingtlang tihhmasawn hna, loneitute tanpuina atan leh Mizoram a mipui dawr nasat deuh bank thenkhatte tanpuina atan sum a thehchhuak tawh a ni a ti.

Governor chuan Rural Infrastructure Development Fund(RIDF) - thingtlanga hmasawnna ruhrel siamna tura tanpuina sum kaltlangin Mizoram tan NABARD in sum tam tham tak a thehchhuak chu thil lawmawm tak a ni a ti a. Hetih rual hian heng sum hmanga hmalakna te hi duh anga chakin kalpui a la ni lova; tan lak nasat a ngai hle a, NABARD atanga tanpuina sum kan hmuh te hi sumhnar dang kan hmuh te aia hlut zawk zia kan hriat a ngai a ni a ti.

NABARD in Bank pawimawh tak pahnih Mizoram Rural Bank (MRB) leh Mizoram Cooperative Apex Bank (MCAB) ten zau zawka mipui rawng an bawl theih na tura sum a puktir pawh thil lawmawm tak a ni a. Hei hian heng Bank te tan hian kuthnathawktute an tanpuina kawngah awlsamna a siam ngeiin a rinawm a ti. NABARD chu Bank leh mipuite indawrna kawngah awlsamna siamtu ni chhunzawm zel turin a chah a. Mizoram hmasawnna atana theih tawp chhuah chhunzawm tur leh hmasawn zel tum turin NABARD hnathawkte chu a chah bawk a ni.

Governor chuan Mizorama Bank awm zinga priority sector huanga hmalatute hnena pawisa puktir kawnga hnathawk tha pathum - Mizoram Rural Bank, Mizoram Cooperative Apex Bank leh State Bank of India te hnenah lawmpuina thilpek a hlan a. Hetianga customer te hnena luanchhuah kawngah hian Bank tam tak Mizorama inbun customer tam tak nei te chu tan lak thar kan beisei a ni a ti.

Governor speech : dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-41st-foundation-day-of-nabard-on-12th-july-2022

Dr.R.Lalthangliana chuan NABARD in kum 40 chhunga India rama thingtlangmite tihhmasawnna leh loneitute chawikanna kawngah bul tantu pawimawh tak a ni a. Heng hmalaknaah te hian hlawhtlinna ropuitak tak a nei tih a sawi a. An hlawhtlinnaah a lawmpui tih sawiin NABARD chu Mizoram mipuite leh sawrkar tan hmasawnna hna thawh kawnga thawpui pawimawh tak a ni thin a, a ni mek a ni a ti.

Abik takin Rural Infrastructure Development Fund(RIDF) hmanga thingtlang hmuna hmasawnna ruhrel din kawngah NABARD leh Mizoram sawrkar te chuan hna pawimawh tak an thawk dun mek a. RIDF hi Mizoram chhunga thingtlang khuate tihhmasawn kawnga hmalakna pawimawh tak a ni a. RIDF hnuaia hmalakna te hi a pawimawh em avangin sawrkar chuan tha taka thawh a nih theih nan theih tawp a chhuah zel dawn a ni a ti.

Dr R.Lalthangliana chuan NABARD in Mizoram mipui tena kan dawr nasat - MRB leh MCAB te hmalakna atana sum tam tham tak a puktir chu lawmawm a tih thu a sawi a. Hei hian heng bank dawrtute tan awlsamna kawng tam takah a thlen ngei dawn a ni a ti. NABARD chuan tuna thingtlanga a hmalakna huang zauh zel se a duh thu a sawi a. Thingtlanga tui thianghlim in tur pek chungchangah te, school building sak that, damdawiin chei that leh tihchangtlun kawngah leh thildangah te NABARD atanga tanpuina kan mamawh belh tih a sawi bawk a ni.

NABARD din cham vawi 41-na lawmna inkhawm hi kalkhawmte lawmna thu Pu KVSSLV Prasada Rao, GM, NABARD hnen atanga ngaithlak niin bul tan a ni a. Khuallian leh khualzahawm te bakah Prof KRS Sambasiva Rao, Vice Chancellor, Mizoram University ten thu an sawi a ni.

He hunah hian Governor chuan Mizoram NABARD hmalakna inziahna, lehkhabu "Snapshot of NABARD’s initiatives in Mizoram” chu a tlangzarh a. Hemi zawhah hian MCAB hnenah Micro ATM a hlan a, Mobile Van chahbi Primary Agricultural Credit Societies (PACS) hnenah hlan lehin MRB hnuaia hmalatu JLGs hnenah Cheque a hlan leh bawk a ni. He hunah tho hian NABARD thawhpui society leh minal sumdawng hnathawk tha te hnenah NABARD in lawmpuina thilpek chu Dr.R.Lalthangliana in a hlan a. Health Minister hian NABARD in Bank hrang hrang ten Financial Literacy campaign an kalpuina tur a tum sak chu Bank official te hnenah a hlan leh a ni. Pu T Guite, DGM, NABARD in lawmthu sawiin NABARD rising day function hi khar a ni a. Function zawhah hian Health Minister chuan Mobile Van a vailiam nghal bawk a ni.