No.2029/2021-2022

Aizawl, 27th August, 2021 : Vawiin khan SAD Conference Hall, MINECO ah COVID-19 hripui lengin Mizoram a nghawng dan thlirho a ni a. He hun hi Health & Family Welfare Minister Dr. R. Lalthangliana'n kaihruaiin, DM&R Minister Pu Lalchamliana, AMC Mayor Pu Lalrinenga Sailo, Chief Secretary Pu Lalnunmawia Chuaungo, DM&R hotute leh Health Department hotute, ZMC hotute, Police hotute, Aizawl DC, Aizawl City Local Council Association, MKHC, IMA, MOT leh Jt. NGO Coordination Committee aiawhte an tel a ni.

Vawiin meetingah hian Dedicated COVID Hospital-Zoram Medical College (ZMC) hotute chuan ZMC a COVID-19 hri kai an enkawl dan an sawi a, an zirchianna ah Mizorama COVID-19 vanga nunna chan zinga 86.5% hi ZMC a admit an ni a, nunna chan 174 an zirchian tawhte zinga 125 hi Aizawl khawpui chhunga mi an ni a, midang 49 hi Aizawl pawn atanga admit an ni. Nunna chan an zirchian tawh zinga 50% hi symptom an neih veleh a sample test nghal lo an ni a, kar hnih chuang symptom an neih hnua sample test tir chauhte pawh an awm tih sawiin, mipuite chumahni in chik renga symptom an neih chuan a rang thei ang bera in test nghal turin an duh tak meuh tih an sawi a ni.

Nunna chan an zirchian tawh zinga 65% hi kum 60 chunglam an ni a, nunna chan zingah vaccine la lo mi 133 awmin full dose la tawh mi 21 leh first dose la mi 30 an awm a, vaccine la chung hian vanduai chuan hri a kai theih a ni tih an sawi a, damlo an enkawlna atanga an tawnhriat atangin vaccine lak hian awmzia a nei hle a ni tih an sawi a ni. Nunna chan zingah insawiselna/damlohna nei lo mi 23 an awm tawh a, an zingah hian kum lama la thalai tak takte pawh an awm a ni. Vawi hnih positive nawn mi pakhat nunna chan a awm tawh bawk a ni. Natna benvawn nei nunna chan zingah zunthlum vei, thisen sang, thawhah/asthma, cancer, TB, thin tha lo leh kal tha lo an tam bik tih sawiin, mitinin mahni taksa uluk a, insawizawi fo a pawimawh tih hre thar leh se an duh thu an sawi bawk a ni.

June leh july thla khan ZMC ah raipuar COVID-19 hri kai nunna chan mi 4 an awm a, August thla chhung hian chawhrualin nitin raipuar cOVID-19 positive mi 14 enkawl reng ang a ni a, tun thlengin nunna chan an awm lo a ni. ZMC hotute chuan damdawi leh inenkawlna hmanrua dinhmun a tha tih sawiin thlaphawnawm a awm lo an ti a, damdawi awm loh vang emaw, ventilator chan loh vang emaw, oxygen hip tur neih loh vanga nunna chan an la awm lo tih an sawi bawk a ni. Thawktu volunteers indaihlohna a nasa hle tih sawiin sawrkarah an thlen tawh tih an sawi a, Genomic Sequencing tihna tur khawl US $ 50000 man chu a thlawnin USA atangain an dawng dawn hnai tih an sawi bawk a ni.

COVID-19 vaccine pek chhuah kawngah nasa taka tan lak niin report thar berah COVID-19 vaccine first dose pek chhuah zat hi India ram pumpuiah 49% a nih laiin Mizoramah chuan 85% a ni a, India ram State leh UT zingah Mizoram chuan a titha 8 na dinhmun a hauh a, Full dose pek zat (first dose la tawh atangin) hi India ramah 14% a nih laiin Mizoramah chuan 29% a ni a, India ram State leh UT zingah a titha dinhmun 6 na Mizoramin a hauh a ni.

Dawrpui Multipurpose Hall leh bawngkawn South YMA Hall-ah vaccine la thei, la la ve lo te tan engtiklai pawhin a lak theihb tih sawi a ni a, second dose la thei tawhte tan pawh a pan theih reng a, Aizawl pawn lam atanga lo kal, second dose lak hun tawhte tan pawh a lak theih reng a ni. Mizorama vaccine pek theih zat hi mi 7,75,106 vel nia chhut niin heng zinga 6,54,083 hian fist dose an la tawh a, full dose la tawh mi 2,32,681 awmin vaccine la la lo hi mi 1,21,023 an awm a ni.

Vaccine stock dinhmun a tha a, vaccine la la ve lo te lak kim tir turin beihpui thlak tum a ni a, ruahmanna siam mek a ni. School leh zirna ina thawktu zawng zawngten vaccine an lak vek theihnan District headquarters tinah ruahmanna siam tha tih a ni bawk.

Meetingah hian July ni 20 atanga sample test runpui (mass test) kalpui a nih hnuah nimin thlengin khua/veng 75 ah mass test neih a ni tawh a, sample 96371 test niin positive mi 2830 hmuh an ni a, positivity rate hi 2.93% a ni. August thla chhung bikah ni 26 thlengin sample 1,86,502 test a ni tawh a, positive mi 16,831 hmuhchhuah niin, positivity rate hi 9.02 a ni a, mi 58 in nunna an chan tawh a ni. Juky thla khan sample 1,44,630 test niin positive 18,433 hmuhchhuah an ni a, positivity rate hi 12.74% a ni thung a ni.

Vawiin meetingah hian College leh University hawn chungchangte sawiho a ni a, Higher & Technical Department in SEC ah rawtna an thehlut tawh a, a tul angin thuneitute hian an ngaihtuah dawn a ni. SOP hman lai mek pawh sawiho niin rawtna hrang hrangte ngaihthlak a ni a, a tul angin SEC in hma a la ang.

Health Minister Dr. R. Lalthangliana chuan hripui leng dona kawngah mitinin mawhphurhna kan nei a ni tih I hre thar theuh ang u a, a ti a. Kan dinhmun a hma aiin kang deuh angin lang mahse inthlahdah chi a ni lo tih sawiin mahni hmun theuhah mitinin sawrkarin kan himna tura inkaihhruaina a siamte kha uluk tak leh fimkhur takin i zawm theuh ang u, a ti.