No.2028/2021-2022

Aizawl the 27th August 2021 : Vawiin chawhma khan Urban Development & Poverty Alleviation Department leh DC Office, Kolasib tangkawp buatsaihin ‘One Day Sensitization Workshop on Solid Waste Management and Operationalization of Solid Waste Management Centre, Kolasib’ chu I&PR Conference Hall, Project Veng Kolasibah neih a ni a.

Pu Gaston Vanlalhriatpuia, District Urban Development Officer chuan he hun hi kaihruaiin Pu H. Lianzela, Director, UD&PA & State Mission Director, Swatch Bharat Mission (Urban) leh Dr. H. Lalthlangliana, Deputy Commissioner, Kolasib chuan Workshop hawnnaah hian thusawina hun an hmang bawk a ni.

Dr. H. Lianzela, Director, UD&PA chuan Kolasiba Solid Waste Management kalpui dan tur - Pilot Project sawifiahna neiin, a hlawhtlinna chu mipuite kutah thui tak a innghah thu a sawi a. Khawtlang faina mitin mawhphurna a nih angin mipui kaihhruaina kawngah khawtlang hruaitute, tlawmngai pawl hrang hrang hruaitute leh District Sanitation Task Force-te thawhhona a pawimawh thu a sawi a. Faina chu Pathian thu nen pawh thil in rem tak, kristian ram kan nihna ang pawh a kan tih ngei ngei tur a nih thu a sawi bawk a ni.

Kolasib DC chuan kalkhawmte fuihna thu sawiin “Thil a awm lohna tur hmuna a awm hian bawlhhlawhah a chang mai zel a, hman tangkai a nih theih nana felfai taka sawngbawlna hna Kolasiba kalpui a ni tur chu changkanna kawnga hmasawnna ropui tak a ni” a ti.
Pu R. Lalnuntluanga, Sanitation Expert, UD&PA leh Pi R. Lalmuanpuii, Procurement Specialist, DUDO, Kolasib ten kalkhawmte tan bawlhhlawh sawngbawl dan leh Kolasib Solid Waste Management Centre kalpui dan tur zirtirna hun an hmang a. Kolasib khawchhunga bawlhhlawh paih dan tur leh bawlhhlawh tawih thei leh tawih thei lo paih ni leh motor tlan dan turte inhrilhriatna an nei bawk a ni. Pu Peter Vanlalhriata, KNOW WASTE Founder chuan Kolasib SWMC atanga bawlhhlawh tawih thei lo (dry waste) an sawngbawl dan tur leh heng bawlhhlawhte tih ral dan tur bakah KNOW WASTE in a hralh chhuah kawnga hma an lak dan tur te a sawi fiah bawk a ni.

He Workshop-ah vek hian DUDO, Kolasib leh KNOW WASTE Company-te’n bawlhhlawh sawngbawlna kawnga an thawhhona tur inremsiamna an ziak fel nghal a. Kolasib khaw chhunga a veng hrang hrang atangin Sanitation Task Force-te telin, Solid Waste Management chungchanga zawhna leh sawihona hun pawh hman nghal a ni.

Kolasib Solid Waste Management Centre hi UD&PA hnuaia Swachh Bharat Mission (Urban) scheme kaltlanga thawh leh puitlin a ni a. August ni 28, 2021 hian Pu H. Lianzela, Director, UD&PA hovin officials leh staff te bakah bawlhlawh sawngbawltute zawng zawng leh a hmuna thawktute nen enlawkna leh tihchhinna ‘Trial Run’ neih a ni ang a. A hawnna ‘Inauguration of Kolasib SWMC’ hi September ni 3, 2021-ah Dihmunzawlah Deputy Chief Minister Pu Tawnluia leh Kolasib bialtu Minister, Pu K. Lalrinliana te telpuina hnuaiah neih tura ruahman a ni. Swachh Bharat Mission (Urban) Scheme hnuaiah vek hian District Khawpui hrang hrangah bawlhlawh sawngbawlna hmun ‘Solid Waste Management Centre’ buatsaihna tura ruahmanna kalpui mek zel a ni bawk.