No.2027/2021-2022

Aizawl the 27th August, 2021: Vawiin khan Fisheries Department Minister Pu K.Lalrinliana chuan SEDP hnuaia sangha vulhtute tih hmasawnna tur a Mizoram district hrang hranga sangha chi sem tur tharchhuak tur a thlan Fish Seed farm 7 zinga 3, Mizofa Fish Seed Farm, Chemphai, Ngente Fish Seed Farm, Chemphai leh Ruattei Fish Seed Farm, N.Chawnpui te chu a hmun ah a endik.

Fisheries Minister Pu K.Lalrinliana chuan SEDP kaltlanga sangha vulhtute tih hmasawnna kawnga hmalakna atan a Fish Seed Farm 7 atanga sangha chi nuai 45, September, 2021 chhunga sem chhuah tum a nih thu sawiin ram chhung a sangha chi tharchhuah ngei sem a ni tur chu lawmawm a tih thu a sawi. Minister chuan SEDP hnuaia Fisheries Department kaltlanga hmalaknaah hian sangha chi man zaa sawmsarih (70%) chu sawrkarin a tum sak tur thu leh sangha vulhtuten zaa sawmthum (30%) chauh an tum tur thu a sawi a. Mizoramah sangha a intodelhna kawngah hmasawnna a thlen ngei a beisei thu sawiin sangha chi sem chhuah tura buatsaih mek a endik te chu tun dinhmunah chuan lungawithlak a tih thu a sawi.

Pu F.Vanlallawma, Director, Fisheries Department chuan SEDP hnuaia sangha chi semchhuak tur Seed Farm-te chu tehfung hrang hrang uluk tak a duan paltlang chauh te thlanchhuah an nih thu leh sem chhuah turte hi Indian Major Carp leh Exotic Carp chi te an tel thu a sawi.

Ngente Fish Seed Farm atangin sangha chi nuai 6.5, Mizofa Fish Seed farm atangin sangha chi 4.25 leh Ruattei Fish Seed Farm atangin sangha chi nuai 7 September 2021 chhung hian semchhuah tur a ruahman a ni.

Fish Seed Farm, Chemphai leh N.Chawnpui tlawhnaah hian Pi C.Lalparmawii, DFDO, Pu K.Lalmalsawma, FEO, Pu Hmingthanzuala, DIPRO leh Seed Farm neituten an tawiawm bawk a ni.