No.2030/2021-2022

Aizawl the 27th August, 2021 : Vawiin khan School Education Department leh Doordarshan Kendra Aizawl-ten School Education Secretary Office Chamber-ah DD Mizoram channel-a Educational TV Programme chhunzawm nan inremna an ziak. He inremna ziah thar lehah hian School Education Department aiawhin Secretary Dr Lalzirmawia Chhangte chuan a ziak a, Doordarshan Kendra Aizawl aiawhin Head of Programme Pu Vanlaltlana Varte chuan a ziak bawk.

Dr Lalzirmawia Chhangte chuan kum 2015-a bul tan Educational TV Programme chhunzawm zel a ni chu lawmawm a tih thu a sawi a. Tunlai khawvelah classroom teaching bakah technology thar ber ber hmanga zirtirna kalpui hi a pawimawh a ni a ti. Hripui leng avang hian eng chen nge class pangngai a khaihlak dawn hriat a ni lova, academic session liam taah pawh tutorial class chu DDK leh cable TV te nen hlawhtling takin kalpui a lo ni tawh a, naupangin mita an hmuh hmanga zirtirna hian an thiam theihna a tipung a. Chuvangin, TV programme hi mipui zirtir nan leh naupang zirtir nan a pawimawh hle a ni a ti.

DDK Head of Programme Pu Vanlaltlana Varte chuan DDK chu mipuite TV a ni a, a neitu chu sorkar a ni tih sawiin a tira a din chhan ber pawh 'education' hi a ni a, hmuhnawm leh en nuam ringawt hi a din chhan a ni lo a ti a. Sorkarin Programme a neihte tichhuak a, mipuite zirtir hi a hna a ni tih sawiin Educational TV Programme chhunzawmna atana thawhdunna ziah a ni leh ta chu lawmawm a tih thu a sawi.

Pu James Lalrinchhana, Director, School Education chuan he hunah hian report pein Educational TV Programme chu School Education, SCERT leh MBSE te tanghova programme siam thin a nih thu a sawi a, September 2021 atangin kum khat chhungin chawlhkar tin Ningani apiangin tlai dar 6:00-6:30pm inkarah programme tihchhuah chhunzawm a ni dawn a, TV programme atana tul pawimawh chu Programme Advisory Committee-ten an umzui dawn a ni a ti. TV Programme hi Media Cell, School Education Department leh SCERT ten an siam leh dawn tih a report bawk.

School Education Department leh DDK Aizawl ten Educational TV Programme tihchhuah chhunzawmna atana thawhdunna tur thuthlung ziahna Pu V.Lalruatsanga, Joint Secretary, School Education kaihhruaiah hian School Education Department Secretary leh Director bakah SCERT Director Pi Laldawngliani Chawngthu, Pu Lalhmachhuana, SPD Samagra, Pi Sarah Lalengzami Pachuau, Director Academic MBSE, DDK hotute leh Programme Advisory Committee Member te an tel a ni.