No.3247/2021-2022
Aizawl, 2nd December, 2021 : Dr PC Lalramenga, Member, State-Level Expert Team on COVID-19 Management chuan COVID-19 hrik chhuak thar “omicron” chungchangah zawhna a tam , mithenkhat zingah chi-aina leh inhnialna a awm avangin sawifiah a ngai tih a sawi a. Tun dinhmunah he hrik thar hi a hlauhawm leh hlauhawm loh sawi theih a la ni lova, mithiamten an zirchiang meka, kar hnih tal a tlem berah a hlauhawm leh hlauhawm loh hre turin hun a la duh a ni, a ti.

Dr. PC Lalramenga chuan omicron chungchang sawifiah zuiin, he hrik thar hi thla kalta November ni 19 khan Africa khawmualpuia Botswana ram atanga South Africa a damlo inentir tura kal mi pakhat atanga hmuhchhuah a nih thu a sawi a, mithiamten chawl lovin ni thum chhung COVID-19 positive tharte an zirchian hnuah virus hrik chhuak thar a ni tih an finfiah a, WHO hriattir nghalin WHO chuan Virus chhui zur ngai leh ngaihtuahawm (Variant of Concern) ah a puang zui a ni a ti.

Dr. Ramenga chuan COVID-19 virus hmuhchuah tawhte aiin omicron ah hian protein spike (a hling rawn lawr chhuak) hi a letin atam zawk avangin COVID-19 virus inkaichhawn awlsam ber Delta variant ai hian inkaichhawn a awlsam hle dawn tih a sawi a, kar hnih liam ta chhung khan South Africa ah hri kai thar a hma aia a let li a tam hmuhchhuah an ni hian chu chu a nemnghetin a lang a ti a. Kum 2020 kum laihawl atang khan COVID-19 virus insiam danglam strain chi hrang hrang hmuhchhuah tan a ni a, WHO in chhui zui ngai leh ngaihtuahawm a tih bikte chu Alpha, Beta, Gamma, Delta leh Omicronte hi an ni a, tun dinhmunah khawvela COVID-19 hri kai zinga 99.8% hian Delta variant an kai a, hei hi omicron hian a luah lan thuai tura ngaih a ni a ti bawk.

Dr. Ramenga chuan nizan thleng khan ram 23 a Omicron hi chhuichhuah tawh a nih thu sawi langin, India sawrkar leh Mizoram sawrkar pawh nasa takin he hrik hmachhawn tur hian a inbuatsaih a, State-Level Expert Team on COVID-19 Management chuan India ram pawn atanga lo lutte lo dawnsawn dan tur leh an zawm tur rawtna sawrkarah a thlen tawh thu sawiin reiloteah sawrkarin a notify kan beisei a ni, a ti.

Dr. Ramenga chuan Omicron chu zirchian mek a nih thu sawi nawn lehin a hlauhawm leh hlauhawm loh chungchangah engmah a la sawi chian theih loh a, mahse hri inkaichhawn awlsam tak a nih avang hian hri kai an tam na na na chuan ngaihtha taka awm ngawt chi a ni lova, hetih rual hian he hrik laka in venna tha ber chu kan hriat tawhsa - hmai tuamna vuah uluk, kut silfai uluk leh midang hlata puipunna hmuna awm lohte hi a ni a, heng hi tha taka kan zawm a, sawrkarin inkaihhruaina a siamte tha taka kan zawm chuan kan him lohna chhan tur a awm lo, a ti a. COVID-19 first wave leh second wave kha hmun dang aiin kan dawng tlai a, Omicron pawh hi kan dawng a nih pawhin kan dawng tlai leh ngeiin a rinawm a, hmun dang boruak thlirin uluk taka lo inbuatsaih theihna hun kan neih a rinawm a ni a ti a. Tunlaia Mizorama COVID-19 hripui leng chunchangah hunpui lo thleng turah hian fimkhur taka kan inven tlan chuan kum tharah chuan kan dinhmun a tha hle tawha a rin thu a sawi bawk a ni.