No.3666/2021-2022

Aizawl, the 14th January 2022 : Nimin tlai khan Prime Minister Pu Narendra Modi hovin state tin Chief Minister-te leh Union Territory a Lt. Governor/ Administrator te chuan virtual meeting neiin, India rama Covid-19 case pung chho thar leh omicron variant darh zel chungchanga hmalakna te sawiho a ni. Mizoram Chief Minister Pu Zoramthanga pawh a tel a ni. 

Prime Minister chuan state tin chu fimkhurna thlah lovin inring reng a awm turin a chah a. Eng variant pawh lo awm se, vaccine lak hi tunah chuan a he hrileng dona hmanraw pawimawh, finfiah sa a la nih reng thu a sawi a. A tul anga inkhuahkhirhna siam chang a awm thu te sawiin, chutihrual chuan mipuite eizawnna leh state ei leh bar khawih na lo thei ang ber zawnga ruahmanna siam ni se a ti a. Hri veite enkawl dan kawngah Home Isolation chu a tam thei ang ber kalpui turin leh, home isolation a awmte inenkawl dan tur tha taka chhuah a, uluk taka zawm ni se a ti bawk. 

He virtual meeting ah hian Home Minister Pu Amit Shah pawh telin kalkhawmte lawmna thu a sawi a. Union Health Secretary in India dinhmun tarlangin, Karnataka, West Bengal, Tamil Nady, Jharkhand, Madhya Pradesh, Punjab, Assam leh Manipur CM te an state dinhmun sawina hun pek a ni. 

CM Pu Zoramthanga hi Health & Family Welfare Minister Dr. R. Lalthangliana, Chief Secretary Dr. Renu Sharma, Health Secretary Pu R. Lalramnghaka, NHM Mission Director Pu Eric Zomawia leh officer dangten an tawiawm a ni.