No.3665/2021-2022

Aizawl, the 14th January 2022 : Vawiin khan Home Minister Pu Lalchamliana hovin Secretariat Conference Hall, MINECO-ah halpuah/halmawi, sky lantern leh silai lem mu nei khap chungchang review meeting neih a ni.

Pu Lalchamliana chuan sawrkar mi pawimawh te bakah tlawmngai pawl hrang hrang aiawh kalkhawmte chibai bukin tun hnai hunpui vuakveta halpuah hal khap chungchanga an hmalaknaah lawmthu a sawi a. Kum kal tawh dang te ngaihtuahin hmasawnna hmuh tur a awm nia a hriat thu sawiin Police duty te, YMA duty te leh khawtlang hruaitute chungah Home Minister chuan lawmthu a sawi a ni.

Hunpui vuak vet,  a bik takin kumhlui thlah zanah District dangah hal an tlem viau laiin Aizawl khawpuiah erawh hal an awm nual a. Police Station hrang hrangah mihring man leh case register dan chu hetiang hi a ni:-

Aizawl Police Station: Case register-12, mihring man -12, puak thei thil man hlut zawng- Rs. 99,175

Bawngkawn Police Station: Case register-7, mihring man -7, puak thei thil man hlut zawng- Rs. 35,920

Vaivakawn Police Station: Case register-2, mihring man -2, puak thei thil man hlut zawng- Rs. 5030

Kulikawn Police Station: Case register-2, mihring man -5, puak thei thil man hlut zawng- Rs. 60,250

Mihring 26 man zinga 19 hi halpuah leh halmawi kawl vanga man an ni a, mi 7 hi hal vanga man an ni a. Case register 23 zinga 16 chu halpuah leh halmawi lam chi kawl vanga man an ni a, case 7 chu hal vanga register an ni.

Police mi leh sa te bakah Central YMA hmalaknain kumhlui thlah zanah leh hunpui vuakvetah Aizawl khawpui veng hrang hrangah duty insiam a ni a. Public information mike, electronic media, social media leh chanchinbu hmangin mipui inzirtirna te an buatsaih thin a ni.  Meeting-ah hian khapna thupek kengkawha tlawmngai taka duty YMA Branch tithate hnenah Home Minister’s discretionary fund atangin lawmman pek ni se tih a ni a. Branch ti tha thlang turin Central YMA ruat an ni.

Kum hmasa lamah minute 45 zet chhum lo chatloa halpuah hal a nih laiin kuminah erawh minute 20 chhung chhum lo chat loin a puak a. Halpuah hal hi khap hlawhtling vek lo mahse hmasawnna erawh a awm niin meeting-ah hian sawilan a ni. Aizawl tihlohah chuan District capital dang pahnih Lunglei leh Kolasib-ah halpuah hal tlem an awm a, District capital dang zawngah erawh halpuah hal an awm lo niin meeting-ah hian tarlan a ni.