No.3664/2021-2022

Aizawl, the 14th January 2022 : Vawiin khan Home Minister Pu Lalchamliana'n Mizoram Police Subordinate Officers' Association (MPSOA) Guest House, CID Complex hawngin, MPSOA General Conference-ah khuallian a ni nghal a ni.

MPSOA Guest House hawnna inkhawmah hian thu sawiin khuallian Pu Lalchamliana chuan MPSOA hmalakna ropui tak Guest House sak zawh a nih theihnana association hruaitute inpekna leh remhriatna te chhuanawm a tih thu leh, Guest House neih a lo tih theihnana association member te inlungrualna chu entawn tlak leh fakawm a ti a. Engpawh mai a taka awm tir tur chuan rilru ngaihtuahna nasa tak hman a ngai thin a, vawiina guest house a lo awm theih chhan pawh hi a bulthumah chuan ngaihtuahna seng mi, association in hruaitu an neih vang a ni, a ti a. MPSOA hian member 3500 chuang a nei a, chung zingah chuan Aizawl a chhungkhat laina hnai thlen in neilo tan Guest House hi tangkai taka hman a nih a rin thu leh, midangte pawhin an chhawr tangkai hle a rin thu a sawi a. MPSOA member te chu a neitu an ni a, an pawisa thawhkhawm cheng nuai 74 chuang a sak nan an hmang phal chu, fakawm tiin, midangte tan entawn tlak an nih thu a sawi a. Mizo te zingah sawrkar atanga tanpuina pawisa (fund) a innghat ngawr ngawr a hma la lo a, mahni intodelha, bul tan tum chu kan uar lehzual a ngai a ni, a ti a. Minister chuan Hrangturzo Constituency chhungah MLA Fund cheng nuaikhata bul tanin zin mite thlenna tur sakna khua a awm tih sawiin, a tuldang chu khawtlang mi inphal te pawisa thawhkhawm atangin  leh hnatlanga sak zawh a nih thu a sawi a. Hmundangah pawh heng ang hi uar zel a, intodelh thinlung pu a kan awm hi a pawimawh a ni a ti a.

Khuallian Pu Lalchamliana chuan MPSOA member te chu a taka a hmun a hnathawk ber tute an ni a, rukru misual te lakah nu nau hmeichhia te thlamuang taka an awm theih nana inpe zo taka hnathawk tu te an ni, a ti a. Hnathawhnaah rinawmna te, mahni hlawha lungawi tawkna te, tunlai khawvel thiamna leh changkangna technology hmang tangkai thiam zel a mahni chanvo hlenchhuak zel turin a fuihin a ngen bawk a ni.

MPSOA Guest House hi Rs 250 lakh seng a sak a ni a, building hnuai ber basement atanga conference hall thlengin floor 6 a ni a, a building hi feet 75 a sei,  a vang feet 34 a ni a, a vaiin 2550 square feet a ni. Groundfloor ah hian motor 6 leh 2 wheeler 20 chuang a leng a, guest room 22, office, reception, dining hall, gym, chowkidar quarter bakah conference hall te a awm a ni. MPSOA hruaitute hian project list siam in, member unit hrang hrang ten a chhung cheina tur an thawh bawk a ni.

MPSOA Guest House hi kum 2016 khan bul tan a ni a, a tirah chuan MPSOA pawisa a bul tan a ni a, Mizoram sawrkar leh PHQ lam ten sum fai a do let in, mimal thahnemngai te leh mi inphalte puihna in puitlin a ni.

He hun ah hian Pu John Neihlaia, IPS, IG (HQs) chu khualzahawm a ni a. Pu JH Chunglianthanga, MPSOA President chuan kaihruaiin, thusawi tawi mi hrang hrang hnen atanga ngaihthlak a ni a. First Session a zawh hian Second Session, MPSOA OB Election in a zui a ni.