2285/2024-2025

Dated Aizawl, the 28th September, 2024: Vawiin chawhnu khan 21st Commonwealth Parliamentary Association India Region Zone -III kharna inkhawm Mizoram Assembly Session Hall-ah neih a ni a. Chief Minister Pu Lalduhoma chuan a telpui.

Thu a sawinaah Chief Minister chuan, he conference tel tura lokal zawng zawngte chungah lawmthu ka sawi a, ni hnih chhung inpawh taka India hmarchhak hmasawnna tur kan sawihona te khan hmarchhak state te inkarah inunauna tha zawk, inhriattawnna thuk zawk leh thawhhona tha zawk a thlen ngei dawn a ni. Mizoram hian rambuai kan tawh avangin hmasawnna hna thawh kawngah kan tlai bik a. Nimahsela, state dangte um reng renga awm erawh kan tum lo. Kum 2047 a Developed Country a India ram hlan kai tumna kal zelah hian nasa taka beitu kan nihzia pawh kan Sustainable Development Goals (SDGs) Index atangin a hmuh theih a ni. Kum 2023-24 SDG index, NITI Aayog in an tihchhuahah khan Mizoram chuan 72 kan score-a, India rama a titha pawl kan ni. Hmabak kan la neihte kan bawhzui zung zung theih nan Central sawrkar tanpuina tam zawk kan mamawh hle. Mizoram chauh ni lovin, NE states zawng zawngten kan mamawh a ni. Hmarchhak bial hmasawnna tura tha thawhtu pawimawh chu DoNER leh NEC te hi an ni a. Anni hi tihchak deuh deuh a tul. Nimahsela, anni pahnih hmalakna hi inbawhthuah leh inhne rual lo a awm thin a. Hei hian harsatna a siam thin tih kan hre theuh a ni. Vawiina kan sawiho ang khan, DoNER leh NEC te hi chhunfin (merge) an nih chuan chak lehzualin hmarchhak bialten kan mamawh te pawh min phuhruk thei zawkin a rinawm, a ti.

Chief Minister hian Bana Kaih Scheme hmanga Viksit Bharat 2047 tihhlawhtling tura hma lak an tum dan tarlangin, he scheme a hlawhtlin theih nan hian DoNER leh NEC te thawhpuina Mizoramin a mamawh thu a tarlang a. NEC a lo changtlun lehzual theih nana rawtna a neihte a sawi bawk.

Conference kharna inkhawm hi Pu Sharingain Longkumer, Speaker, Nagaland Legislative Assembly, Region Zone - III Chairman ni bawk chuan a kaihruai a. Pu Lalbiakzama, Speaker Mizoram pawhin a kharna thuchah sawiin Pu Vanlalhlana, Parliamentary Affairs Minister chuan lawmthu sawina a nei thung.