2286/2024-2025

AIZAWL; the 28th September, 2024: A ni hnihna atan vawiin khan  Commonwealth Parliamentary Association (CPA), India Region, zone-III , 21st Annual Conference member kalkhawm te chuan Plenary session neih lehin, “Project hrang hranga ruahhmanna leh thawhhona tha zawk a awm theih nan DoNER Ministry leh NEC  chhunfin” (Merging the Ministry of DONER with NEC for better strategic planning and coordination of various projects in the region) chungchang chu khunkhan tak leh huapzau taka sawiho a ni.

Vawiin  Plenary Session hnihna hi  Pu Sharingain Longkumar, Hon'ble Speaker of the Nagaland Legislative Assembly leh Chairman of CPA, India Region, Zone- III, ni bawk chuan kaihruaiin, Chairman chuan  Pu Harivansh Narayan Singh, Deputy Chairman, Rajya Sabha chu nimin lama an thukhel “India - ASEAN hmathlir sumdawnna leh thawhhonaa hmarchhak ram te telh dan" (Inclusion of the Northeast Region in the India - ASEAN vision for Trade & Cooperation) chungchang  tuihniha, vawiin thupui sawiho tur te chu member ten tha taka an sawiho theih nan a khuhhawnna neih zui turin a sawm a.

Pu Harivansh Narayan Singh, Deputy Chairman, Rajya Sabha chuan Mizoram sawrkar leh Mizoram  Legislative Assembly chu tha tak leh hneh taka Commonwealth Parliamentary Association (CPA), India, Region, Zone-III, Annual Conference  vawi 21-na  an thlen theih avangin lawmpuina thu hlanin, an mikhual te duat taka an lo dawn sawn avangin lawmthu   a sawi hmasa a. Tichuan Pu Harivansh  chuan DoNER leh NEC chhunfin tur hian ngaihtuahna fim tak nen, a thatna leh that lohna te, a behbawm leh kaihhnawih thil tam tak awm theih te hre reng chungin, North Eastern State ten in thatpui ber tur leh inhlawkpui ber tur, hmasawnna thlentu tur rel chhuah tum ang che u, tiin a fuih hlawm a ni.

 Pu Sharingain Longkumar, Chairman of CPA, India Region, Zone- III, chuan session hawnna thuchah sawiin, hetiang plenary session rorelna kaltlang te hian a ni India ram parliamentary democracy tichaka, mitin huapzo hmasawnna rahbi tuk thin ni!. Chuvangin vawiinah hian keini  india hmarchhaka cheng ten kan thatpui ber tur kan rel chhuah theih nan member tin ten kan ngaihdan leh veivawng te tlang takin i sawi ang u, tiin member te a sawm.

Tichuan India Region, Zone-III, CPA Member te chuan Project hrang hranga ruahhmanna leh thawhhona tha zawk a awm theih nan Ministry of Development of North Eastern Region (DoNER)  leh North Eastern Council (NEC) chhunfin chu a that zawkna emaw that loh zawkna emaw te, khunkhan taka an sawiho hnuah a hnuaia mi ang hian thutlukna an siam ta a ni:

Thukhawm chuan India-ASEAN Vision for Trade and Cooperation hnuaia Northeast Region tel ve dan tur chungchang ngun taka a ngaihtuah hnuah telh ve nise tih a ni a. Prime Minister kaihhruai Sawrkar laipuiin Northeast Region hmasawn nana 'Act East Policy' a kalpui chu tha tiin, hemi tichaka hmalakna zau zawk nein a nih theih nan Northeast Region chu India-ASEAN bilateral trade agreement-ah telh a, International Border a neihte chhawr tangkaia India ram thanna tha tichaktu a nih theih nan hmalak ni se tih a ni a. India -Myanmar - Thailand Highway leh Kaladan Multi Modal Transit Transport Project-te zawhfel thuai tura hmalakte, International Trading outpost neih mek Moreh (Manipur), Zokhawthar (Mizoram) Pangsha leh Avangkhu (Nagaland) leh Pangsu Pass (Arunachal Pradesh) leh a dangte pawh thuamchak ni se tih a ni a. Northeast Region chu khualhip kawnga theihna nasa tak nei, hnam ziarang leh nunphung hrang hrang awmna a nih avangin hemi chawilar leh hmasawnna ruhrel siam kawngah theihtawp chhuaha hmalak nise tih a ni a, hmun tin tuama eizawnna siam tura tanlak nise tih a ni a. Northeast Region leh ASEAN ramte inkarah insumdawnna leh thawhhona tha zawk siam a nih theih nan Cultural Exchange Program pawh siam tura hmalak nise an ti bawk.

Hemi bakah hian Northeast Region-a hmasawnna ruhrel pawimawh tak takte awmze nei zawka thlunzawm leh ruahmannate awlsam zawka siam a nih theih nana DONER Ministry leh NEC chhunfin chungchang pawh ngaihtuah a ni bawk a. DONER Ministry leh NEC kaltlanga scheme leh policy-te tha taka kalpui a niha, inhne remlo a awm loh nan a hranpain Ministry tan chauh Parliament-ah Departmental Related Standing Committee (DRSC) hran siam tura rawtna thlen nise tih a ni a, Northeast Region atanga MP intelkhawmte India sawrkar bakah Lok Sabha Speaker leh Rajya Sabha Chairman te hemi chungchang hi a hma thei ang bera sawipui tura biak nise tih a ni.

RESOLUTION OF THE 21ST CPA INDIA REGION ZONE.pdf

Vawiin Plenary session-ah hian Pu Sharingain Longkumara’n  Session Hall a chhuahsan hlanin Pu Lalbiakzama, Hon’ble Speaker of Mizoram Legislative Assembly in inkhawm hi kaihhruai a ni.