Information and Communication Technology Department chuan e-Procurement workshop ni 17th November, 2016 khan sorkar department Secretaries leh head of Department tan a buatsaih.
Workshop hi Pu C. Lalhmachhuana, Secretary, ICT Department in a kaihruai a. Chief Secretary Pu Lalmalsawma, IAS chuan kalkhawm te hnenah e-Procurement hi State 24 ah hman a nih tawh thu a sawi a, Mizoram ah chuan kum 2013 atangin department panga(5) ah a bul tan nan hmang tura hmalak a nih thu a sawi bawk. Chief Secretary chuan Cabinet Minister meeting ni 21st September, 2016 neih ah e-Procurement hi tender nuai 100 chin chunglamah chuan hman tan tur a an pawm tawh thu sawiin, Department tin te hmang tangkai turin a hriattir.
e-Procurement hi Digital India project hnuaia Mission Mode Project pakhat niin, Ministry of Commerce & Industry in central ah chuan an kalpui a. e-Procurement Software hi NIC siam niin kum 2007 khan Tamil Nadu ah hman tan a ni. Mizoram ah chuan ICT Department hi nodal department niin, NIC lam ten a tul angin technical support an pe thin a ni.
Internet (Online) kaltlanga man man zawk, tha zawk, awlsam zawk leh langtlang taka contract hna pek, bungraw lei leh hralh a nih theihna tura ruahmanna siam hi e-Procurement thil tum a ni a. e-Procurement hi sorkar-ah hman a nih chuan tender chhuah, tender chhanna thehluh, tender fee pek, tender evaluation leh contract hna pek thlengin awlsam takin online (Internet) hmangin a tih theih dawn a ni. He system hi hman a nih chuan tender chhangtuten sorkar office kal kher ngai lovin anmahni in atangin tender an chhang thei dawn a, chu chuan sorkar leh mipuite tan awlsamna a thlen bakah sum, tha leh hun luangral tur a veng thei dawn a ni.
Workshop ah hian Pu Tapan Prakash Ray, Tech Director, NIC Bhubaneswar leh Pu Nihar Ranjan Biswal, Principal System Analyst, NIC Bhubaneswar ten e-Procurement system chungchangah presentation an pe a, sawi hona hun neih a ni bawk a. Dr. Lalthlamuana, Chief Informatics Officer, ICT Department in lawmthu sawina a neih zawhin workshop hi khar a ni.
