State Legal Services Authority (SLSA) leh Centre for Peace and Development (CPD) buatsaihin vawiin khan ruihtheih thil laka naupangte fihlim theihna tur hmalakna Seminar on Protecting Children From Drugs neih a ni a. Gauhati High Court Judge, Justice Manash Ranjan Pathak chu khuallian a ni.

Khuallian Justice MR Pathak chuan thu sawiin naupangte chu nakin lawka ram leh hnam innghahna la ni mai tur an nih avangin an pawimawh a, mi tha ni tura kan zirtir chuan kan ramin hmabak eng tak a la nei dawn a ni, a ti. Drugs leh ruihtheih thila sumdawnna hi khawvelin tih rem tum mah se sum maktaduai tam tak leh mihring sang tel an inrawlh avangin nuaibo mai a harsa a, chuvangin drugs lakah thalaite fihlim tura inzirtir hi thil pawimawh tawp khawk a ni, a ti a. Rilru leh taksa khawih khawlo tu drugs hmansual hian nunna tam tak a suat tawh a, a suat mek bawk a ni tiin khuallian chuan seminar hlawk taka hmanga, drugs that lohzia midangte zirtirtu nih tum turin kalkhawmte a chah a ni.

Seminar ah hian Govt. Republic High School, Helen Lowry School, Vaivakawn High School, Govt. Khawpuia Memorial Higher Secondary School, St.Joseph Higher Secondary School leh Govt. Mizo High School zirlaite an tel a. Seminar hawnna inkhawm hi chawhnu dar 2 ah neih niin Mizoram SLSA Member Secretary Pu Joel Joseph Denga’n kalkhawmte lawmna thuchah a sawi a. CPD Childline Coordinator Pi Lallawmzuali’n seminar hman dan tur tlangpui a sawi a ni.

Seminar-ah hian Mizoram State Tobacco Control Society, Central YMA, Social Welfare Department, Health Department, ND&PS Prosecution Branch leh Aizawl West College atangin mithiam ten thupui thlan bik hmangin thu an sawi a ni.