No.4402/2021-2022
Aizawl, the 25th March 2022: Vawiin khan Chief Secretary Pi Renu Sharma hovin CS Conference hall-ah State Level Coordination Committee an thukhawm a, PM POSHAN Annual Work Plan & Budget 2022-23 chu thlirhova pawm a ni.

Meeting-ah hian PM POSHAN hnuai Primary School 1408 leh Middle School 1087, a vaiin school 2495-te hnenah chaw chhun pek a nih thu tarlan a ni a. Naupang 1,43,471 ten an chhawr tih report a ni. School hrang hrangah Kitchen Garden 1066 a awm a, Covid-19 hripui len laiin school kal theih a ni lo naa, zirtirtuten chaw chhun chu naupangte inah kal chilhin an sem reng a, hripui len lai hian chaw chhun sem zel a ni tih tarlan a ni bawk.

PM POSHAN hi Mid Day meal tih thin kha a ni a, tun hnaiah a hming hi thlak a ni.

Kum 2022-23 atana Budget ruahman Primary School tan cheng nuai 1522.02, Middle School tan cheng nuai 1052.67, a vaiin cheng nuai 2574.69 te chu meeting-ah hian pawm a ni a, heng zinga cheng nuai 2078.89 chu Central share a ni a, cheng nuai 495.80 chu state matching share a ni dawn a ni. Heng sum ruahman te hi Ministry of Education Project Approval Board-in April 7, 2022-a a thlir hman turin thehluh a ni dawn a ni.

Meeting-ah hian Chief Secretary bakah School Education Secretary Dr Lalzirmawia Chhangte, School Education Officer te, Department danga an thawhpui Finance, Planning, Health & Family Welfare, Rural Development, FCI, Food Civil Supplies & Consumer Affairs, Aizawl leh Lunglei DC te an tel a ni.