No.4403/2021-2022
Aizawl, the 25th February 2022 : Vawiin khan Magic Bus Foundation chuan School Education Directorate Conference Hall-ah School Headmaster, Zirtirtute leh Community Coordinator hnathawk thate lawmpuina hun an hmang a, he hun hi School Education Director Pu James Lalrinchhana’n a hmanpui a ni.

School Education Director Pu James Lalrinchhana chuan thusawiin hripui leng avanga school kal theih loh chhungin Magic Bus Foundation nen thawhhona tha tak an nei thei tih a sawi a. Magic Bus ten Covid-19 hripui lengin zirlai leh zirtirtute a nghawng dan Aizawl District huamchhungah an zir chiang tih sawiin he zirchianna atang hian zirlai leh zirtirtuten harsatna an tawh dan te an hriatchian phah a, hei hi thil tangkai tak a nih thu a sawi.

Pu James-a chuan School Education Department chuan thawhpui chi hrang hrang an neih zingah Magic Bus a tel thu a sawi a. Headmaster leh zirtirtute chu thawhhonaah tan la sauh sauh tur leh India rama a titha ber kan nih theih nana tan la turin a fuih a ni. Magic bus te thiltum, thalaiten retheihna kalsana khua leh tui tha an nih theih nana thiamna pek tih chu naupangte a tak rama hmantlak an nih theih nana mamawh a nih thu a sawi bawk.

Magic Bus-te hian School Education Department nena an thawhhonaa hnathawk tha Headmaster 3 leh zirtirtu 16 te lawmpuina an hlan a. India ram pumah naupang zirlai nuai 4 vel chu life skill zirtirin an tuam mek a, State 24 ah hna an thawk a, District 75-ah school 2342 te an thawhpui a, heng zinga school 270 chu Mizoram chhunga school te an ni.

Magic Bus te hi School Education leh Samagra Shiksha te nen an thawkhova, thawhhona school tinah teacher hman bik pahnih zel an nei a, naupangte chu life skill zirtir bakah pawl 12 thleng zir chhuak ngei turte, a hun hmaa nupui pasal nei lo turtein an zirtir thin a ni.

Vawiina Headmaster leh zirtirtu hnathawk thate lawmpuina hun hmanah hian School Education Officer leh Samagra Shiksha Officer thenkhatte, Headmaster leh zirtirtu lawmpuina an hlan te leh Magic Bus-a thawkte an tel a ni.